Tramptyń qylmystyq isi boıynsha sottaǵy alǵashqy jeti alqabı tańdaldy

ASTANA. KAZINFORM – Alǵashqy jeti adam burynǵy prezıdent Donald Tramptyń sotynda ádil ári beıtarap úkim shyǵara alatyndaryna sendirgennen keıin qazylar alqasynyń quramyna saılandy, dep habarlaıdy NBC News. 

AQSh-tyń alqabıler soty 12 adamnan turady. 96 úmitkerdiń ishinen tańdalǵan alǵashqy jeti adam ant berdi jáne dúısenbide segiz aptaǵa sozylatyn sot protsesin bastaıdy. 

Qazylar alqasy týraly kelesi málimet bar: 

Birinshi alqabı: Batys Garlemde (Nıý-Iork aýdany) turady, satý salasynda jumys isteıtin adam. Ol úılengen jáne «kez kelgen nárseni taza aýada» istegendi unatady.

Ekinshi alqabı: Joǵarǵy Ist-Saıdta (Nıý-Iork qalasy) turatyn áıel, «Memorial Sloan Kettering»-te onkologııalyq medbıke bolyp jumys isteıdi. Onyń sóz baılasqan juby bar. Ol bos ýaqytyn otbasymen sondaı-aq dostarymen ótkizgendi unatady. Saıabaqta ıtimen serýendegendi jany súıedi.  

Úshinshi alqabı Chelsıde (Nıý-Iork qalasy) turatyn jas jigit, korporatıvti quqyq zańgeri bolyp jumys isteıdi. Jaıaý júrýdi jáne júgirýdi jaqsy kóredi.

Tórtinshi alqabı Tómengi Ist-Saıdta turatyn orta jastaǵy er adam, IT boıynsha oqytý jáne keńes berýmen aınalysady. Úılengen, bir balasy men eki nemeresi bar. 

Besinshi alqabı Garlemde turady. Muǵalim bolyp jumys isteıtin jas áıel. Ol jigitimen turady. Teatrǵa barǵandy jáne sahattaǵandy unatady. 

Altynshy alqabı Chelsıde turatyn jas áıel. Mamandyǵy – ınjener-programmıst. 

Jetinshi alqabı Joǵarǵy Ist-Saıdta turatyn er adam, azamattyq advokat bolyp jumys isteıdi. Ol tabıǵat aıasynda ýaqyt ótkizgendi unatady. 

Nıý-Iorkte Donald Trampqa qatysty qylmystyq protsess dúısenbi kúni bastaldy. Bul burynǵy prezıdenttiń qylmystyq is boıynsha sotqa alǵash ret tartylýy.