Tramptyń kesirinen Tesla kompanııasy tek baj salyǵyna bola 300 mln dollar joǵaltty

ASTANA. KAZINFORM — Tesla kompanııasynyń taza paıdasy ekinshi toqsanda 16%-ǵa tómendep, 1,2 mlrd dollarǵa jetti, al elektromobılderiniń satylymy 12%-ǵa qysqardy, dep jazdy DW.

Tesla qarjy dırektory Vaıbhav Tanedjıdiń aıtýynsha, qosalqy bólshekter men akkýmýlıatorlardy ımporttaýǵa salynǵan jańa baj salyǵynan kompanııa 300 mln dollardan astam shyǵynǵa ushyrady. Sonymen qatar, brendtiń álemdik elektromobıl jetkizilimderi 13,5%-ǵa qysqaryp, 384 myń kólikke deıin tómendedi. Ásirese elektromobıl naryǵy úshin dástúrli mańyzdy Kalıfornııada quldyraý 20%-ǵa deıin jetti.

n-tv basylymynyń atap ótýinshe, Masktyń basqa bıznes-iskerlikteri de qıyndyqqa tap bolǵan. Mıllıarder Donald Tramppen ashyq qaqtyǵys jaǵdaıynda AQSh úkimeti xAI jáne SpaceX kompanııalarymen jasalǵan memlekettik kelisim-sharttardy toqtatý múmkindigin qarastyryp otyr. 

Buǵan deıin Pentagon xAI kompanııasymen 200 mln dollarǵa deıingi kelisimshart jasalǵanyn habarlaǵan edi, al SpaceX AQSh-tyń zymyran qorǵanys júıesi «Altyn kúmbez» jobasynyń yqtımal ázirleýshisi retinde ataldy. Bul jobanyń ıdeıasy Trampqa tıesili.

Aıta keteıik, buǵan deıin Tesla Optimus óndirisin ýaqytsha toqtatqanyn jazǵan edik.