Tramptyń keńesshisi: prezıdent Iranmen soǵysty jaqyn arada aıaqtaýdy kózdep otyr
ASTANA. KAZINFORM – AQSh prezıdentiniń arab álemi jáne Taıaý Shyǵys máseleleri jónindegi aǵa keńesshisi Massad Býlos Donald Tramp Taıaý Shyǵystaǵy soǵysty jaqyn arada aıaqtaýǵa nıetti ekenin málimdedi, dep habarlaıdy Euronews.
Býlos naqty merzimdi ataýdan bas tartyp, bul sheshimdi Tramptyń ózi qabyldaıtynyn aıtty. Onyń sózinshe, prezıdent soǵysty beıbitshilikpen aıaqtaý úshin jumys istep jatyr.
– Prezıdent soǵys jaqyn arada aıaqtalady dep sanaıdy jáne máseleni beıbitshilikpen aıaqtaýǵa nyq bekingen. Ol osy maqsatta jumys istep jatyr. Ol – istiń adamy. Prezıdent Tramptyń ýádelerin qalaı oryndaıtynyn bárimiz kórdik. Saılaýaldy nemese basqa ýádeleriniń eshqaısysyn oryndamaı qalǵan joq, – dedi Býlos Dýbaıda ótken arab medıa sammıtinde Euronews-ke bergen suhbatynda.
Keńesshi ıadrolyq másele soǵysty toqtatýdyń negizgi sharttarynyń biri ekenin atap ótti. Onyń aıtýynsha, AQSh Irannyń ıadrolyq qarýǵa ıe bolýyna esh jaǵdaıda jol bermeıdi. Býlos Tramp kelissózder men dıalogqa múmkindik berip otyrǵanyn aıtyp, óńirde beıbitshilik ornaıtynyna úmit bildirdi.
Býlos Trampty «beıbitshilik prezıdenti» dep atap, onyń segiz qaqtyǵysty rettegenin jáne qazir taǵy eki janjalmen jumys istep jatqanyn aıtty. Alaıda ol naqty qaı qaqtyǵystardy meńzegenin jáne adam shyǵynyna qatysty derekterdi naqtylamady.
Býlos «Avraam kelisimderin» keńeıtý jumysy 2020 jylǵy AQSh prezıdenttik saılaýyna baılanysty toqtaǵanyn, qazirgi soǵys aıaqtalǵannan keıin qaıta jalǵasýy múmkin ekenin aıtty.
Ol AQSh-tyń Saýd Arabııasy, Mysyr, Iordanııa jáne Parsy shyǵanaǵyndaǵy basqa eldermen qarym-qatynasy berik ekenin atap ótti. Býlostyń pikirinshe, Taıaý Shyǵys turǵyndarynyń bir bóligi Tramptyń dástúrli otbasy qundylyqtaryna qatysty ustanymdaryn qoldaıdy.
Sýdandaǵy jaǵdaıǵa toqtalǵan keńesshi bul eldegi soǵysty da tezirek toqtatý qajet ekenin aıtty. Onyń málimetinshe, Sýdanda 35 mln adam gýmanıtarlyq kómekke muqtaj, al AQSh soǵys bastalǵaly beri elge 3 mlrd dollardan astam gýmanıtarlyq kómek bólgen.
Býlos sondaı-aq Tramptyń aralyq saılaýǵa daıyndyq jumystaryn júrgizip jatqanyn aıtty. Onyń sózinshe, amerıkalyq saılaýshylar úshin ishki máseleler ádette negizgi basymdyq bolyp qala beredi.
Eske sala ketsek, buǵan deıin Tramp EO-ǵa baj salyǵyn kóteretini týraly málimdep, eskertý jasady.
Sondaı-aq ol AQSh Joǵarǵy sotyn qatań synǵa aldy.
