Tramptyń Iranǵa soqqyny toqtatý týraly málimdemesinen keıin munaı baǵasy tómendedi
ASTANA. KAZINFORM – AQSh prezıdenti Donald Tramptyń Iranǵa qarsy soqqylardy toqtatý múmkindigi týraly málimdemesinen keıin munaı baǵasy kúrt tómendedi, dep habarlaıdy Bild.
Tramp sońǵy eki kúnde AQSh pen Iran arasynda Taıaý Shyǵystaǵy qaqtyǵysty tolyq toqtatýǵa baǵyttalǵan «óte jaqsy ári nátıjeli kelissózder» ótkenin aıtqannan keıin birneshe mınýt ishinde Brent markaly munaıdyń bir barreli qysqa ýaqytqa 100 dollardan tómen tústi.
Sonymen qatar, dúısenbi kúni saýda-sattyqty 2 paıyz tómendeýmen bastaǵan Germanııanyń DAX qor ındeksi keıin kúrt ósim kórsetti.
Iran bıligi ázirge Tramptyń málimdemesine resmı túrde túsinikteme bergen joq.
Buǵan deıin Aq úı basshysy Tegeranǵa ýltımatým qoıyp, 48 saǵat ishinde Ormýz buǵazyn keme qatynasyna ashýdy talap etken. Áıtpese Irannyń energetıkalyq ınfraqurylymyna soqqy jasalatynyn eskertken.
Óz kezeginde Iran Ormýz buǵazyn tolyq jabýy múmkin ekenin, sondaı-aq Izraıldiń energetıkalyq jáne IT ınfraqurylymyna, AQSh bazalary ornalasqan aımaqtardaǵy elektr stantsııalaryna soqqy jasalýy yqtımal ekenin málimdegen.
