Tramptyń Iranǵa qatysty saıasaty respýblıkashyldar arasynda synǵa ushyraı bastady
ASTANA. KAZINFORM – AQSh-taǵy Respýblıkashyldar partııasynda Donald Tramptyń Iranǵa qatysty saıasatyna narazylyq kúsheıip keledi. Bul týraly Politico basylymynyń Aq úıdegi bıýrosynyń jetekshisi Dasha Bernstiń BILD-ke jarııalanǵan maqalasynda jazylǵan.
Onyń aıtýynsha, Tramptyń seriktesteri bastapqyda prezıdentke ýaqyt berýge daıyn bolǵan, alaıda olar qaqtyǵystyń qysqa merzimde aıaqtalýyn kútken.
Sońǵy ýaqytta bul alańdaýshylyq ashyq sıpat ala bastady. Osy aptada AQSh Ókilder palatasy Iranǵa qarsy áskerı is-qımyldardy shekteýge baǵyttalǵan áskerı ókilettikter jónindegi qarardy qabyldady.
– Qujattyń praktıkalyq saldary aıtarlyqtaı bolmasa da, onyń saıası mańyzy zor. Tórt respýblıkashyl kongressmen demokrattarmen birge daýys berdi. Ádette Trampty biraýyzdan qoldaıtyn partııa úshin bul sırek kezdesetin ashyq kelispeýshilik, – dep jazady Dasha Berns.
Politico málimetinshe, respýblıkashyldardy, ásirese Kongreske ótetin aldaǵy saılaý aldyndaǵy saıası táýekelder alańdatyp otyr. Atap aıtqanda, munaı men janarmaı baǵasynyń ósýi qarapaıym amerıkalyqtardyń turmysyna áser etip, partııanyń reıtıngin tómendetýi múmkin.
– Respýblıkashyl saıasatkerlerdi Taıaý Shyǵystaǵy qaqtyǵystyń uzaqqa sozylýy men onyń ekonomıkalyq saldary kóbirek alańdatady. Baǵanyń ósýi saılaýshylardyń kóńil-kúıine tikeleı áser etýi yqtımal, – delingen maqalada.
Bernstiń pikirinshe, Donald Tramp áli de Tegeranmen kelisimge kelýdi kózdeıdi jáne aýqymdy soǵysqa múddeli emes.
Alaıda Taıaý Shyǵystaǵy shabýyldar jalǵasqan saıyn Aq úıge túsetin qysym da kúsheıip keledi.
– Qazir negizgi másele Tramptyń kelisimge qol jetkizgisi kele me degen suraq emes. Negizgi suraq – eger ol kelisimge qol jetkize almasa, qandaı qadamǵa barady, – dep túıindeıdi Dasha Berns.
Aıta keteıik, Iran Tramptyń qoqan-loqysyna qaramastan AQSh-pen kelissózdi jalǵastyratynyn málimdedi.
