Tramptyń burynǵy keńesshisi Djon Bolton qylmystyq jaýapkershilikke tartyldy
ASTANA. KAZINFORM — Donald Tramptyń birinshi prezıdenttigi kezinde ulttyq qaýipsizdik jónindegi keńesshisi bolǵan, keıinirek Aq úı basshysyn qatty synaǵan Djon Bolton qupııa aqparatty zańsyz bóliskeni úshin aıyptaldy. Bul týraly VVS agenttigi jazdy.
Ol FBR-diń burynǵy dırektory Djeıms Komı men Nıý-Iork bas prokýrory Letıtııa Djeımsten keıin qylmystyq jaýapkershilikke tartylǵan amerıkalyq kóshbasshynyń úshinshi qarsylasy boldy. Boltonnyń kinási dáleldense, uzaq merzimge bas bostandyǵynan aıyrylýy múmkin.
Tamyz aıynda FBR agentteri saıasatkerdiń qupııa aqparatpen jumys isteýine qatysty tergeý aıasynda onyń úıi men keńsesine tekserý júrgizdi.
Bolton kinásin moıyndamady. Onyń advokaty Ebbı Loýell Bolton qujattardy durys júrgizgenin aıtty. Ol juma kúni resmı túrde bılikke beriledi.
Beısenbide AQSh ádilet mınıstrligi isti Merılend shtatyndaǵy alqabıler alqasyna usyndy. Olar Boltondy aıyptaý úshin sebep te, dálel de jetkilikti dep kelisti.
26 bettik aıyptaý qorytyndysyna sáıkes, Boltonǵa ulttyq qorǵanystyń aqparatyn taratqany úshin barlyǵy 8 aıyp jáne ony zańsyz saqtaǵany úshin 10 aıyp taǵyldy.
Prokýrorlar ony jeke elektrondyq poshtany jáne basqa habar almasý qyzmetterin paıdalanyp AQSh ulttyq qorǵanysy týraly óte qupııa aqparatty zańsyz taratty dep aıyptaıdy.
— Bul qujattar bolashaq shabýyldar, syrtqy qarsylastar jáne syrtqy saıası baılanystar týraly barlaý málimetterin kórsetti, — delingen Ádilet departamentiniń qujatynda.
Qorytyndyda Djon Bolton qupııa qujattardy elektrondy poshta arqyly aty-jóni atalmaǵan, biraq amerıkandyq BAQ ókilderiniń aıtýynsha, onyń áıeli men qyzy bolýy múmkin eki «ruqsat etilmegen adamǵa» jibergeni aıtylǵan.
— Árbir aıyp eń kóp degende 10 jylǵa bas bostandyǵynan aıyrady, — dep jazady AFP.
Jýrnalısterdiń Boltonǵa taǵylǵan aıyptarǵa reaktsııasy týraly suraǵyna jaýap bergen prezıdent Donald Tramp óziniń burynǵy kómekshisin «nashar adam» dep atady.
Bolton Tramptyń 2020 jylǵy saılaý aldynda óziniń «Bári bolǵan bólme» atty memýarynyń jarııalanýyna tosqaýyl qoıý áreketi sátsiz bolǵanyn eske saldy.
— 2021 jyly meniń elektrondyq poshtamdy buzǵan kezde FBR bul týraly tolyq habardar etti. Aldyńǵy ákimshiliktiń 4 jylynda osy tergeýlerden keıin birde-bir aıyp taǵylǵan joq. Sodan keıin «Tramp 2 keldi», ol Iosıf Stalınniń tusyndaǵy qupııa polıtsııa bastyǵynyń sózin beıneleıdi: «Maǵan adamdy kórsetińiz, men sizge qylmysty kórsetemin», — dep qosty Tramptyń burynǵy keńesshisi.
Aıta keteıik, tamyz aıynda Tramptyń ulttyq qaýipsizdik jónindegi burynǵy keńesshisi Djon Boltonnyń úıinde tintý júrgizildi.