Tramptyń Beıbitshilik keńesi týraly ıdeıasyn qoldaý qajet dep oılaımyn — Toqaev
ASTANA. KAZINFORM — Memleket basshysy jańa Konstıtýtsııa jobasyna qatysty referendýmda daýys bergennen keıin jýrnalısterge arnalǵan brıfıng barysynda Taıaý Shyǵysta, sonyń ishinde Palestınada beıbitshilik ornatý múmkindigi áli de bar ekenine kámil senetinin aıtty.
Brıfıng barysynda Euronews telearnasynyń tilshisi Boıan Brkıch «Siz Qazaqstan halyqaralyq arenada orta derjava retinde tanylǵanyn udaıy aıtyp kelesiz. Elińiz Prezıdent Tramp qurǵan Beıbitshilik keńesine múshe boldy. Sizdiń oıyńyzsha, Taıaý Shyǵystaǵy qazirgi jaǵdaı Beıbitshilik keńesine qalaı áser etedi? Bul bastama ómirsheń deı alasyz ba? Donald Tramptyń jobasyn qoldaý jónindegi sheshimge qalaı keldińiz?» degen saýal qoıdy.
— Eń aldymen, Amerıka Qurama Shtattarynyń Prezıdentine qurmetim erekshe ekenin atap ótkim keledi. Onyń aqyl-parasatqa negizdelgen strategııasy óte durys, quptaýǵa laıyq.
Beıbitshilik keńesi týraly bastamanyń ıdeıasy, halyqaralyq kún tártibindegi kúrdeli máselelerdi sheshýdegi jańashyl tásilderi kóńilden shyqty. Munda áýeli dástúrli dıplomatııa men iri bıznestiń múmkindikteri ushtasady. Bul qarapaıym halyqqa, sonyń ishinde Gaza sektorynyń turǵyndaryna naqty paıdasyn tıgizedi. Álem halqy bitpeıtin konferentsııalardan jalyqty. Atalǵan jıyndarda qabyldanatyn izgi nıetti qararlardy azdaǵan adam ǵana oqıdy. Sol sebepti bul ıdeıany qoldaý qajet dep oılaımyn. Óıtkeni tyń sheshimder usynady. Prezıdent Tramp myqty tulǵa retinde áser qaldyrady. Ol — batyl kóshbasshy. Taıaý Shyǵysta, sonyń ishinde Palestınada beıbitshilik ornatý múmkindigi áli de bar ekenine kámil senemin. Bul bastama baıandy bolady dep úmittenemin, — dedi Prezıdent.
Aıta ketelik Qasym-Jomart Toqaev kez kelgen qaqtyǵysty dıplomatııalyq jolmen sheshýdi jaqtaıtynyn aıtqan edi.
