Tramptyń Azııaǵa sapary bastaldy

ASTANA. KAZINFORM — Dúısenbi kúni AQSh prezıdenti Donald Tramp Azııaǵa birneshe kúnge sozylatyn saparyna attandy. Sapar aıasynda ol ATES sammıti kezinde Reseı prezıdenti Vladımır Pýtınmen jáne Qytaı tóraǵasy Sı Tszınpınmen kezdesýdi josparlap otyr, dep habarlaıdy Kazinform agenttiginiń Vashıngtondaǵy menshikti tilshisi CBS News-ke silteme jasap. 

Tramp
Foto: vıdeodan alynǵan skrın

Tramp bul jolǵy saparyn aýqymdy sapar dep atap, Qytaıda Soltústik Koreıa basshysy Kım Chen Ynmen kezdesýi múmkin ekenin aıtty.

Tramp, Sı Tszınpın jáne Vladımır Pýtınniń kezdesýi ıadrolyq qarýdy taratpaý máselesine arnalmaq. Sondaı-aq Iran men Ýkraınadaǵy qaqtyǵysqa basa nazar aýdarylady.

Aldymen AQSh prezıdenti Fılıppınge barady. Onda Ońtústik-Shyǵys Azııa memleketteri qaýymdastyǵynyń jyl saıynǵy sammıti ótip jatyr.

Budan keıin Tramp Japonııa, Úndistan jáne Aýstralııa ókilderimen Úndi-Tynyq muhıty aımaǵyndaǵy qaýipsizdik máselelerin talqylaıdy. Sondaı-aq Taılandpen saýda kelisimine qol qoıyp, Ońtústik-Shyǵys Azııa elderiniń basshylarymen jáne aımaqtyń ózge de jetekshilerimen ótetin keshki asqa qatysýdy josparlap otyr.

Sársenbi kúni AQSh prezıdenti Fılıppın prezıdenti Ferdınand Markospen prezıdent saraıynda túski as ótkizbekshi. Odan keıin Qytaıdyń Shenchjen qalasyna attanady. Onda ATES sammıti aıasynda Azııa-Tynyq muhıty ekonomıkalyq yntymaqtastyǵy uıymyna múshe elderdiń basshylarymen kezdesedi. Al beısenbi kúni Vladımır Pýtın jáne Sı Tszınpınmen júzdesedi.

Sondaı-aq bul saparda AQSh prezıdentine Tesla jáne SpaceX kompanııalarynyń bas dırektory Ilon Mask erip baratyny habarlandy. Alaıda ol Pýtın jáne Sı Tszınpınmen ótetin kezdesýge qatyspaıdy.

Aıta keteıik, buǵan deıin Qytaı Syrtqy ister mınıstrligi Sı Tszınpınniń Vladımır Pýtın jáne Donald Tramppen kezdesetinin rastaǵan bolatyn.