Tramptyń arnaıy ókili Taıaý Shyǵysty aralaıdy
ASTANA. KAZINFORM — Ýıtkoff Qatar, Mysyr, Izraıl, BAÁ jáne Saýd Arabııasyna sapary barysynda Izraıl men HAMAS arasyndaǵy kelisimniń birinshi kezeńin uzartýǵa kúsh salady, dep habarlaıdy Kazinform tilshisi.

Donald Tramptyń Taıaý Shyǵystaǵy arnaıy ókili Stıven Ýıtkoff osy aptada Taıaý Shyǵysqa barady jáne Izraıl men HAMAS arasyndaǵy atysty toqtatý jáne kepilge alynǵandardy bosatý týraly kelisimdi uzartý týraly kelissózder júrgizýge tyrysady. Bul týraly CNN arnasynda saıasatkerdiń ózi málimdedi.
— Bizge ekinshi kezeń merzimin uzartýǵa qol jetkizý kerek. Men osy aptada, múmkin sársenbide, osyǵan qatysty kelissózder júrgizý úshin aımaqqa baramyn. Bizde ekinshi kezeńdi bastaýǵa, ony aıaqtaýǵa jáne taǵy da kepilge alynǵandardy bosatýǵa jetkilikti ýaqyt bolady dep úmittenemin, — dedi Ýıtkoff.
Keıinirek ol saparynda Qatar, Mysyr, Izraıl, BAÁ jáne Saýd Arabııasyna aıaldaıtynyn aıtty.
19 qańtarda kúshine engen úsh fazalyq atysty toqtatý kelisiminiń birinshi kezeńi aıaqtalýǵa jaqyn. Taraptar ózara zań buzýshylyqtar týraly aıyptaýlarǵa qaramastan, kelisim talaptaryn oryndady.
Senbi kúni keleńsizdik boldy, Izraıl tutqyndaǵy alty adamdy bosatqannan keıin 602 palestınalyqty bosatýdy keıinge qaldyrdy. Izraıl premer-mınıstri Bınıamın Netanıahý Izraıl palestınalyq tutqyndardy bosatýdy «kelesi kepilge alynǵandar bosatylǵanǵa deıin jáne qorlaý rásimderinsiz» keıinge qaldyratynyn aıtty.
Kelisimniń alǵashqy alty aptalyq kezeńi 1 naýryzda aıaqtalýy kerek jáne osy kezeńde azat etilýi tıis tutqyndardyń sońǵy toby senbide, ıaǵnı 22 aqpanda bosatyldy.
Atysty toqtatýdyń birinshi kezeńi Gaza sektorynda ustalǵan 33 ızraıldik tutqyndy Izraılde ustalǵan 2000-ǵa jýyq palestınalyq tutqynǵa aıyrbastaý týraly kelisimdi qamtıdy. Ekinshi kezeń Izraıldiń Palestına anklavynan tolyq shyǵýyn jáne qalǵan 60-qa jýyq kepildi bosatýdy qamtıdy.
Taraptar ekinshi kezeńniń sharttaryn kelisý barysynda birinshi kezeńdi uzartýǵa múmkindik beredi. Biraq Izraıl bul kelissózderdiń bastalýyn keshiktirip jatyr, al premer-mınıstr Bınıamın Netanıahýdiń ásire ońshyl koalıtsııadaǵy seriktesteri soǵys qaıta bastalmasa, úkimetti qulatamyz dep qorqytady.
Netanıahý HAMAS-tyń áskerı jáne úkimettik múmkindikteri joıylmaıynsha nemese taratylmaıynsha soǵysty toqtatýǵa kelispeıtinin birneshe ret málimdedi. Tramp ákimshiligi HAMAS-tyń ızraıldik kepilge alǵan áreketterin synaı otyryp, bul perspektıvany kóbirek qoldaıtyn syńaı tanytty.
Ýıtkoff taıaýda ekinshi kezeńniń sharttary mańyzdy problema týdyratynyn moıyndady, óıtkeni Izraıl kepilge alynǵandardy bosatýdy qalaıdy, biraq HAMAS-ty bılikte qaldyrǵysy kelmeıdi.
Eske salsaq, jaqynda HAMAS Izraıldiń kepildegi alty azamatyn bosatty, olardyń ekeýi shamamen 10 jyl tutqynda boldy.