Tramptyń arnaıy ókili Grenlandııaǵa qatysty josparyn aıtty

ASTANA. KAZINFORM — AQSh prezıdenti Donald Tramp Grenlandııa boıynsha arnaıy ókili etip taǵaıyndaǵan Lýızıana gýbernatory Djeff Lendrı Aq úıdiń araldy jaýlap alý jospary joq ekenin anyq bildirdi, dep habarlaıdy BILD.

Tramp ákimshiliginiń «sol jerge bireýdi jaýlap alý úshin barý» nemese «áldebireýdiń jerin tartyp alý» nıeti joq, dep sendirdi Lendrı Fox News efırinde. Onyń aıtýynsha, másele AQSh pen Grenlandııa arasyndaǵy ulttyq qaýipsizdik jáne ekonomıkalyq máselelerdegi yntymaqtastyqty keńeıtý týraly bolyp otyr. 

Basylymnyń jazýynsha, arnaıy ókil muny Grenlandııany strategııalyq mańyzdy jáne resýrstarǵa baı araldyń bolashaqtaǵy jaǵdaıyn talqylaý úshin AQSh-pen «ekonomıkalyq ústel basyna» otyrýǵa shaqyrý dep sıpattady.

Buǵan deıin Aq úı aral bıligimen tikeleı qarym-qatynas ornatý úshin Grenlandııa boıynsha AQSh-tyń arnaıy elshisi etip respýblıkashyl gýbernator Djef Lendrıdi taǵaıyndaǵanyn habarladyq. 

Eske sala ketsek, qańtar aıynda AQSh prezıdenti Donald Tramp Panama kanaly men Grenlandııany baqylaýǵa alý úshin áskerı kúsh, sondaı-aq Kanadany ıelený úshin ekonomıkalyq kúsh qoldaný múmkindigin qarastyratynyn málimdedi.