Tramptyń arnaıy ókili Gaza kelissózderi úshin Qatarǵa keldi
ASTANA.KAZINFORM - HAMAS AQSh-tyń arnaıy ókili kelisimniń kelesi kezeńi boıynsha kelissózderdi bastaýǵa kómektesedi dep úmittenedi, al Izraıl birinshi kezeńdi uzartqysy keledi, dep habarlaıdy Kazinform agenttiginiń menshikti tilshisi.
AQSh-tyń Taıaý Shyǵystaǵy arnaıy ókili Stıven Ýıtkoff Izraıl men HAMAS arasyndaǵy Gaza sektoryndaǵy qazirgi atysty toqtatý kelisimin uzartýǵa baǵyttalǵan janama kelissózderge qatysý úshin Katarǵa keldi, dep habarlaıdy The Times of Israel. Sársenbide Ýıktoff Katar premer-mınıstri Muhammed bın Abdýlrahman ál-Tanımen kezdesedi.
Ol buǵan deıin Qatardy deldaldyq áreketteri úshin maqtap, Mysyr, Saýd Arabııasy jáne BAÁ de kómek kórsetkenin aıtty.
Izraıl AQSh atysty toqtatýdy eki aıǵa uzartý usynysyn alǵa tarta alady dep úmittenedi. Onyń barysynda HAMAS kepilge alynǵandardyń jartysyn dereý bosatýy kerek, dep habarlady seısenbide Izraıldiń resmı ókili.
HAMAS bul usynysty qabyldamaı, taraptar qańtarda kelisilgen sheńberdi ustanýdy talap etedi. Kepilge alýdy toqtatý týraly úsh kezeńdik kelisimniń birinshi kezeńi 1 naýryzda aıaqtaldy. HAMAS soǵysty birjolata toqtatý úshin qalǵan kepilge alynǵandardy bosatý kelisiminiń ekinshi kezeńin birneshe ret talap etti.
HAMAS-qa qysym
Seısenbi kúni Izraıldiń 12-shi arnasy halyqaralyq deldaldardyń – Qatar, AQSh jáne Mysyr – HAMAS-ty usynysty qabyldaý arqyly nıetiniń mańyzdylyǵyn kórsetýge ıtermeleıtinin habarlady. Mundaı qadam atysty toqtatý týraly keńirek kelisimderge qol jetkizýge kóbirek ýaqyt bere alady.
Telearnanyń habarlaýynsha, kelisim boıynsha HAMAS 60 kúndik atysty toqtatýǵa aıyrbas retinde amerıkalyq-ızraıldik Edan Aleksandrdy qosqanda 10 tiri kepildi bosatady.
The Times of Israel basylymy HAMAS tarapynan kelisimniń ekinshi kezeńine ótpeı-aq, atysty toqtatýdy uzaq merzimge uzartýǵa kelisý «nıeti» bar dep habarlaıdy. Palestınalyq top bul usynysty qabyldaý úshin Izraıl túrmelerinde ustalǵan qozǵalystyń joǵary laýazymdy múshelerin bosatýdy talap etýi múmkin.
Aıta keteıik, 10 naýryzda Izraıldiń energetıka mınıstri Elı Koen Gaza sektoryna elektr qýatyn berýdi dereý toqtatý týraly sheshim qabyldaǵanyn habarlaǵan bolatyn. Budan buryn da atysty toqtatý kelisiminiń 42 kúndik birinshi kezeńi aıaqtalǵannan keıin Izraıl Gaza sektoryna gýmanıtarlyq kómek jetkizýdi toqtatqan.
AQSh pen Hamas 1997 jyldan beri alǵash ret tikeleı kelissózder júrgizetinin jazǵan bolatynbyz.