Tramptyń «altyn vıza» baǵdarlamasyna nebári 338 ótinim túsken
ASTANA. KAZINFORM — AQSh prezıdenti ákimshiligi sáýir aıynyń sońynda 2025 jyldyń jeltoqsanynda Donald Tramp bastamasymen iske qosylǵan «altyn vıza» baǵdarlamasyna qatysty ótinimder týraly málimetti jarııalady. Tramp bul baǵdarlamany aýqatty adamdar úshin AQSh azamattyǵyn alýdyń jyldam joly retinde tanystyrǵan edi. «Altyn vızanyń» quny 1 mıllıon dollardan bastalady, dep jazady Meduza.
Sáýir aıynyń sońyna deıin «altyn vızaǵa» 338 ótinim túsken. Ótinish berýshilerdiń tek 165-i ǵana qaıtarylmaıtyn 15 myń dollar kólemindegi tirkeý jarnasyn tólegen. Al olardyń 59-y ǵana kelesi kezeńge — AQSh Іshki qaýipsizdik mınıstrligine qujat tapsyrý satysyna ótken.
The Washington Post basylymynyń jazýynsha, ımmıgratsııalyq zańgerler klıentterin «altyn vıza» baǵdarlamasyna qatysýdan bas tartýǵa shaqyryp otyr. Sebebi bul baǵdarlama Kongrestiń maquldaýynan ótpegen jáne prezıdent jarlyǵymen kúshin joıýy múmkin.
Sonymen qatar baǵdarlama sot daýlaryna tap bolý qaýpine ıe jáne sheteldik ınvestorlarǵa arnalǵan ózge ımmıgratsııalyq baǵdarlamalarmen salystyrǵanda salyqtyq artyqshylyqtar bermeıdi.
The Washington Post baǵdarlamamen jumys istegisi kelmeıtin zańgerler qatarynda Maıkl Ýaılds esimin ataıdy. Ol kezinde AQSh-tyń birinshi hanymy Melanııa Tramp pen onyń ata-anasyna AQSh azamattyǵyn alýǵa kómektesken.
Eske sala keteıik, AQSh vızasyna 15 000 dollar kepil tóleıtin elder tizimi 50-ge deıin kóbeıdi.
AQSh 75 eldiń azamattaryna vıza berýdi toqtatatyny habarlandy.
