Tramptyń «Altyn kúmbezi» tórt deńgeıli qorǵanysqa ıe bolady

ASTANA.KAZINFORM — AQSh prezıdenti Donald Tramptyń ákimshiligi «Altyn kúmbez» dep atalatyn zymyranǵa qarsy qorǵanys júıesiniń jobasyn tanystyrdy, dep habarlaıdy Kazinform tilshisi Reuters-ke silteme jasap.

Amerıkalyq úkimet usynǵan tanystyrylymǵa sáıkes, «Altyn kúmbez» júıesi tórt deńgeıli qorǵanystan turady: onyń biri — ǵaryshtyq, zymyrandardy erte anyqtaý jáne qadaǵalaý úshin qoldanylady, al qalǵan úsheýi jerústi júıeler bolyp tabylady. Olar — zymyran qaǵyp túsirý júıeleri, radarlar, jáne múmkin bolatyn lazerlik qarýlardan turady.

AQSh prezıdenti oılap tapqan bul júıe Izraıldiń «Temir kúmbezine» (Iron Dome) uqsas joba retinde qarastyrylýda. Onyń aldyn ala quny – 175 mıllıard dollar dep baǵalanǵan. Tramptyń salyq jáne shyǵyndar týraly zań jobasy sheńberinde Kongress shilde aıynda 25 mıllıard dollar bólýge kelisim berdi.

Qurlyqtaǵy shtattarda, Alıaskada jáne Gavaı araldarynda qysqa qashyqtyqqa arnalǵan 11 zymyrandyq batareıany ornalastyrý josparlanyp otyr.

Júıeni 2028 jyly iske qosý josparlanǵan. 

Donald Tramptyń aıtýynsha, «Altyn kúmbez» zymyrandardy álemniń kez kelgen núktesinen nemese ǵaryshtan ushyrylsa da qaǵyp túsirýge qabiletti bolady.

Buǵan deıin habarlanǵandaı, AQSh prezıdenti óziniń prezıdenttik merzimi aıaqtalǵanǵa deıin «Altyn kúmbezdi» iske qosýdy kózdep otyr.