Trampty ulyqtaý rásimenen keıin Baıden men Harrıs nemen aınalysady
ASTANA. KAZINFORM — Donald Trampty ulyqtaý rásiminen keıin AQSh prezıdenti Djo Baıden men vıtse-prezıdent Kamala Harrıstiń bolashaǵy qalaı qalyptasady. Osy oraıda bul laýazym ıeleriniń aldaǵy qyzmetine qatysty Kazinform-nyń menshikti tilshisi jaýap izdep kórdi.
20 qańtardan keıin 82 jastaǵy Djo Baıdenniń bos ýaqyty kóbirek bolady jáne ol saıasatqa oralýǵa tyryspaýy múmkin.
Ol óziniń qazirgi qyzmetinen soń aldaǵy jospary týraly kópshilik aldynda az aıtty. Degenmen, sarapshylar bul turǵyda biraz pikirdi alǵa tartyp otyr. Baıden qarajat jınaý jáne óziniń prezıdenttik kitaphanasynyń josparlary boıynsha jumysty bastaýǵa basymdyq berýi yqtımal.
Bul nysan onyń týǵan jeri Delaver shtatynda bolýy múmkin. Ol osy óńirden 36 jyl senator bolǵan jáne prezıdent qyzmetin atqarǵan kezde demalys kúnderiniń biraz ýaqytyn osynda ótkizgen. Mysal retinde Barak Obamanyń prezıdenttik ortalyǵyn aıtýǵa bolady, onyń Chıkagodaǵy kitaphana men murajaıynyń qurylysy 2026 jyly aıaqtalýy tıis.
Sonymen qatar, Djo Baıden úshinshi kitap jazýy múmkin. Ol osyǵan deıin eki estelik jazǵan, ıaǵnı 2007 jyly jarııalanǵan «Promises to Keep» (Ýádeni oryndaý) jáne 2017 jyly shyqqan «Promise Me, Dad» atty týyndylary bar.
Djo Baıden prezıdenttikten ketkennen keıin atqaratyn jumysyna qatysty qyzyq bir ıdeıany aıtqan edi. Byltyr tamyzda saılaýaldy úgit-nasıhat jumystaryn toqtatqannan keıin shamamen bir aı ótken soń, Baıden ınternet-kontent jasaýshylarǵa arnalǵan is-sharada sóz sóılegen bolatyn.
Sol kezde ol: «Men sizderdi Aq úıge nege shaqyrdym? Óıtkeni meni jumys izdep júrgen adamdardyń biri dep sanańyzdar», - dep ázildegen.
Birneshe aptadan keıin Djessıka Alba Aq úıde latynamerıkalyq muranyń aılyǵyn atap ótýge kómektesken kezde, Baıden ózine jumys tabý úshin jaqyn arada óner juldyzynyń iskerlik baılanystary qajet bolýy múmkin dep qaljyńdady. «Djessıka, eger men shynymen jaqsy nátıje kórsetsem, múmkin jumys taýyp berersiń?, - dep aıtqan edi.
Jeltoqsan aıynda Kennedı ortalyǵynyń qurmetti meımandaryna arnalǵan is-sharada ol osy tektes ázil aıtqan edi. «Eger men qınalsam, saǵan kelemin, dosym», - dedi Baıden tanymal akter Robert De Nıroǵa qarata aıtqan sózinde.
Qazirgi kezmetinen ketetin Kamala Harrıstiń kelesi qadamy úshin biraz nusqalar aıtylyp otyr. Birinshisi - kitap jazý bolýy múmkin.
Kamala Harrıs saılaýda Donald Trampqa jeńilgennen beri prezıdent saılaýynda jeńiske jetý úshin 107 kúndik sprınt týraly kópshilik aldynda az sóıledi.
Kommýnıkatsııalar jónindegi dırektor Eshlı Eten vıtse-prezıdent úlgi alarlyq tájirıbesi bar tarıhı tulǵa ekenin, ol Covid-pen kúreste, AQSh-ta ekonomıkany qalpyna keltirýde jáne áıelder quqyǵyn qorǵaýda kóshbasshy bolǵanyn atap ótti. Ony 70 mln-nan astam azamat qoldap otyr.
Budan bólek, Kamala Harrıs 2026 jyly Kalıfornııa gýbernatory, 2028 jyly prezıdentti saılaý kezinde kandıdat retinde qatysýy múmkin ekeni de aıtyldy.
Vıtse-prezıdent óziniń saıası múmkindikterinen bas tartpaıtynyn aıtyp, «men kúresti jalǵastyramyn» dep birneshe márte jarııalaǵan. Jaqyn arada Kamala Harrıs pen onyń keńesshileri Donald Trampqa qalaı jáne qashan qarsy shyǵatynyn aıqyndaý baǵytynda, sondaı-aq Demokratııalyq partııadaǵy óziniń mańyzdy rólin qalpyna keltirý jolynda jumys isteýi yqtımal.
2028 jyldaǵy úmitkerlerge qatysty bolǵan jedel saýalnamada Kamala Harrıstiń reıtıngi 41 paıyzdy kórsetti. Bul óz kezeginde onyń Gevın Nıýsom, Djosh Shapıro, Tım Ýolz, Pıt Býttıdjech, Aleksandrııa Okasıo-Kortes, Grethen Ýıtmer, Endı Beshır sııaqty demokrattardan alda turǵanyn baıqatty.
Ol osy eki laýazymdy alýǵa birden qatysa almaıdy. Sondyqtan sonyń birin tańdaý boıynsha biraz oılanady.
- Ol asyǵys sheshim qabyldaıtyn adam emes. Keıde oǵan áreket etý úshin óte uzaq ýaqyt qajet. Sondyqtan men onyń kelesi qadamynyń qalaı jasalatynyn bilmeıtinine kepildik bere alamyn, - dedi Kamala Harrıstiń burynǵy kómekshisi Braıan Brokaý.
Sonymen qatar ol K. Harrıstiń aldaǵy tańdaýyna qatysty pikir aıtty.
— Ol gýbernatorlyqqa daýysqa túse ala ma? Iá, qatysa alady. Degenmen, ol gýbernatorlyqqa úmitker retinde qatysqysy kelmeıdi dep oılamyn. Bul laýazymǵa qatysty tartysta ol jeńe ala ma? Árıne, jeńý múmkindigi zor. Bul jumys oǵan unaı ma? Bul suraqqa naqty jaýap bere almaımyn. Ol qaıtadan prezıdent laýazymyna úmitker bola ala ma? Ábden múmkin, dedi Braıan Brokaý.
Budan buryn habarlanǵandaı, AQSh prezıdenti retindegi qoshtasý sózinde Djo Baıden amerıkalyqtarǵa baılyq pen bılikti olıgarhtar tobynyń qolynda shoǵyrlandyrý qaýpi týraly eskertti.
Eske salsaq, byltyr qarasha aıynyń basynda Kamala Harrıs Donald Trampqa qońyraý shalyp, prezıdenttik saılaýdaǵy jeńisine quttyqtaý aıtty.