Trampty Reseıge shaqyrdyq – Lavrov
ASTANA. KAZINFORM – AQSh prezıdenti Donald Tramp Reseıge kelý týraly shaqyrtý aldy. Bul týraly RF Syrtqy ister mınıstri Sergeı Lavrov «Rossııa-24» telearnasyna bergen suhbatynda aıtty.
Reseıdiń syrtqy ister vedomstvosynyń basshysy bul usynys eki el basshylarynyń Alıaskadaǵy kezdesýinde aıtylǵanyn jetkizdi.
- Ózderińiz biletindeı, oǵan shaqyrtý jiberildi. Alıaskada bolǵan kezdesýdegi baspasóz-máslıhatynda Pýtın Tramptyń shaqyrylatynyn rastady. Donald Tramp bolsa, eger qatelespesem buǵan qyzyǵýshylyq tanytty, - dedi Lavrov.
Aıta keteıik, Donald Tramppen Alıaskadaǵy kezdesýiniń qorytyndysy boıynsha ótken birlesken baspasóz-máslıhaty barysynda Vladımır Pýtın kelesi kezdesýdi Máskeýde ótkizýdi usyndy. Tramp onyń óte qyzyqty usynys ekenin aıtty jáne onyń bolý múmkindigin joqqa shyǵarmady.
Osyǵan deıin Reseıdiń Alıaska sammıtinen keıin Tramptyń jaýap saparyn kútetini týraly jazdyq.