Tramptar otbasy týraly maqala ABC News telearnasyna qatysty daý týǵyzdy
ASTANA. KAZINFORM — Erık Tramp otbasynyń qorǵanys salasyndaǵy merdiger Anduril Industries kompanııasymen iskerlik baılanystary týraly ABC News telearnasynda qate jarııalanǵan maqalaǵa baılanysty federaldyq tergeý júrgizýdi qoldaıtynyn málimdedi. Bul týraly Kazinform agenttiginiń Vashıngtondaǵy menshikti tilshisi FOX News-ke silteme jasap habarlady.
— Sizder sumdyq materıal jarııalap, onyń taralýyna jáne vırýs sııaqty keń jaıylýyna jol berip, sodan keıin 24 saǵattan soń tún jamylyp, eshqandaı túsinikteme bermesten nemese keshirim suramaı-aq óshire almaısyzdar. Ony kim maquldady? Avtor jumystan shyǵaryldy ma? ABC bizge jaýap berýi kerek, — dep jazdy Erık Tramp H áleýmettik jelisinde.
Ogaıo shtatynan saılanǵan respýblıkashyl senator Bernı Moreno da Disney kompanııasyna tıesili ABC News telearnasynyń saıtynda jarııalanǵan «Tramptyń uldarynyń ınvestıtsııalary ol saılanǵannan beri Pentagonnyń mıllıardtaǵan dollarlyq kelisimsharttarynan paıda ákeldi» degen taqyryptaǵy qate materıalǵa qatysty AQSh-tyń Federaldyq baılanys komıssııasyn (FCC) tergeý júrgizýge shaqyrdy.
— ABC telearnasynyń Anduril men Tramptar otbasyna qatysty saıası tapsyryspen materıal jarııalaýyna baılanysty tergeý júrgizýge shaqyramyn. ABC bul oqıǵany túsinikteme bermesten óshirip, jasyryp qalýǵa tyrysqannan keıin bizge jaýap qajet, — dep jazdy Bernı Moreno H áleýmettik jelisinde.
Alǵashqyda maqala eshqandaı túsiniktemesiz óshirildi. Keıin oǵan túzetýler engizilip, qaıta jarııalandy.
Sársenbide shyqqan bastapqy maqalada AQSh prezıdentiniń uldary Erık Tramp pen Donald Tramp kishimen baılanysty kompanııalar, sonyń ishinde 1789 Capital venchýrlik kompanııasy arqyly, memlekettik kelisimsharttardan mıllıardtaǵan dollar alǵany aıtylǵan.
Morenonyń sózinshe, ABC telearnasy kompanııanyń ınvestıtsııalyq qyzmetin burmalap kórsetip, Tramptar otbasyn federaldyq kelisimsharttar jasasý týraly sheshimdermen negizsiz baılanystyrǵan.
Daýdyń týyndaýyna ABC News telearnasynyń bastapqy maqalasyndaǵy málimet sebep boldy. Onda Tramp kishi seriktes sanalatyn 1789 Capital kompanııasy Anduril kompanııasynyń baqylaý paketin 2,5 mlrd dollarǵa satyp alǵany aıtylǵan. Alaıda shyn máninde, ótken jyly Anduril Industries kompanııasy jalpy somasy 2,5 mlrd dollar bolatyn qarjylandyrý raýndyn ótkizgen. Sol raýnd aıasynda 1789 Capital shamamen 50 mln dollar ınvestıtsııa salǵan.
Juma kúni ABC News túzetilgen maqalany jarııalap, ınvestıtsııalar, memlekettik kelisimsharttar jáne oqıǵalardyń hronologııasyna qatysty qatelikter bolǵanyn moıyndady. Jańartylǵan nusqada Tramp kishi kompanııanyń ınvestıtsııalyq sheshimder qabyldaý jónindegi komıtetiniń quramyna kirmeıtini de naqtylandy.
Jańa taqyryp «Demokrattardyń yqtımal múddeler qaqtyǵysyna qatysty alańdaýshylyǵy aıasynda jańa keme jasaý zaýytynyń qurylysy jarııalandy» dep ózgertildi. Al bastapqy materıal avtorynyń aty-jóni «ABC News» degen belgimen aýystyryldy.
Buǵan deıin AQSh prezıdenti Donald Tramp amerıkalyq ABC pen NBC telekompanııalarynyń lıtsenzııalaryn qaıtaryp alý kerektigin aıtty.
