Tramppen jumys isteýdi kópten beri armandadym - Aq úıdiń jańa baspasóz hatshysy
ASTANA. KAZINFORM – Aq úıdiń jańa baspasóz hatshysy Ketı Zaharııa qyzmetine kiriskennen keıin alǵash ret jýrnalıster aldyna shyqty. Ol AQSh prezıdenti Donald Trampqa senim bildirgeni úshin alǵys aıtyp, onyń komandasynda jumys isteýdi burynnan qalaǵanyn jetkizdi, dep habarlaıdy Associated Press agenttigi.
Zaharııanyń alǵashqy brıfıngi shamamen 14 mınýtqa sozyldy. Ol aldymen kirispe málimdeme jasap, keıin úsh buqaralyq aqparat quraly ókilderiniń suraqtaryna jaýap berdi.
– Aq úıdiń jańa baspasóz hatshysy retinde prezıdent Tramp pen Amerıka halqyna qyzmet etý men úshin úlken mártebe. Men onymen jumys isteýdi kópten beri armandadym, – dedi Ketı Zaharııa.
Ol birneshe kún buryn Aq úıdiń baspasóz hatshysy qyzmetine taǵaıyndalǵan. Buǵan deıin Trump Media & Technology Group kompanııasynda kommýnıkatsııalar jónindegi keńesshi bolyp jumys istegen. Sondaı-aq AQSh-tyń konservatıvtik baǵyttaǵy buqaralyq aqparat quraldarymen yntymaqtastyq ornatqan.
Brıfıng barysynda Zaharııa prezıdenttiń saıası kún tártibin qoǵamǵa jetkizýge nıetti ekenin málimdedi. Onyń aıtýynsha, Donald Tramptyń ózi áli de «óziniń eń úzdik baspasóz hatshysy» bolyp qala beredi.
Aıta keteıik, buǵan deıin Aq úıdiń burynǵy baspasóz hatshysy Kerolaın Levıtt otbasyna kóbirek ýaqyt bólý úshin qyzmetinen ketetinin málimdegen bolatyn. Ol bul laýazymǵa taǵaıyndalǵan kezde AQSh tarıhyndaǵy eń jas Aq úı baspasóz hatshysy atanǵan edi.
