Trampqa oq atqan kúdiktige qastandyq jasamaq boldy degen aıyp taǵyldy
ASTANA. KAZINFORM – Vashıngtondaǵy federaldyq sot Aq úı tilshileri qaýymdastyǵynyń keshi kezinde bolǵan atysqa kúdikti Koýl Tomas Allenge aıyp taqty, dep habarlaıdy BBC.
Aıyptar qatarynda AQSh prezıdenti Donald Tramp ómirine qastandyq jasaýǵa oqtalý, zorlyq-zombylyq qylmysyn jasaý kezinde atys qarýyn qoldaný jáne aýyr qylmys jasaý maqsatynda qarýdy shtattar arasynda zańsyz tasymaldaý bar.
Sot barysynda kúdikti ózine taǵylǵan aıyptardy túsinetinin málimdedi.
Federaldyq prokýror Djoselın Ballantınniń aıtýynsha, Allen birneshe shtattyń shekarasyn kesip ótip, prezıdentke qastandyq jasaýǵa árekettengen. Onyń janynan 12-kalıbrli myltyq, úsh pyshaq jáne basqa da qarýlar tabylǵan.
Prokýratýra kúdiktini qamaýda ustaýdy surady. Sebebi oǵan taǵylǵan aıyptar terrorızmmen baılanysty baptarǵa jatady. AQSh zańnamasyna sáıkes, prezıdentke qastandyq jasaýǵa árekettený ómir boıyna bas bostandyǵynan aıyrý jazasyna ákelýi múmkin.
Buǵan qosa, tergeý barysynda kúdiktiniń otbasy múshelerine «manıfest» joldaǵany anyqtalǵan. Onda ol prezıdentke jetý jolynda eshkimge qaramaıtynyn jazǵan.
AQSh Ádilet mınıstrliginiń ókilderi, sonyń ishinde bas prokýrordyń mindetin atqarýshy Todd Blansh, Federaldyq tergeý bıýrosy dırektory Kash Patel jáne federaldyq prokýror Djınnın Pırro baspasóz máslıhatynda tergeý jalǵasyp jatqanyn málimdedi.
Olardyń aıtýynsha, kúdikti joǵary laýazymdy tulǵalarǵa qarsy iri shabýyl jasaýdy kózdegen. Degenmen quqyq qorǵaý organdary onyń áreketin der kezinde toqtatyp, oqıǵanyń aýqymdy sıpat alýyna jol bermegen.
Kúdiktini qamaýda ustaý máselesi boıynsha tyńdaý beısenbige, al aldyn ala sot otyrysy 11 mamyrǵa belgilengen.
