Trampqa qatysty sot otyrysy aıaqtaldy, endi alqabıler úkim shyǵarady

ASTANA. KAZINFORM —Nıý-Iorkte 2016 jylǵy saılaý aldynda pornoaktrısa Stormı Denıelske qatysty tólemaqyny saılaýshylardan jasyrý úshin qarjy esebin burmalady dep aıyptalǵan AQSh-tyń burynǵy prezıdenti Donald Tramptyń tarıhı qylmystyq sotynyń tyńdaýy aıaqtaldy, dep jazady VVS. 

Sot bir jarym aıǵa jýyq ýaqytqa sozyldy. 

Іstiń búkil jaı-japsaryn anyqtaý úshin sotqa negizgi kýágerler shaqyryldy (sonyń ishinde Denıelstiń ózi de), olardan prokýrorlar da, eks-prezıdenttiń advokattary da jaýap aldy. Tramp barlyq otyrysqa qatysty.

Seısenbi kúni sot taraptardyń sońǵy sózderin tyńdady. Ádette 16:30–da aıaqtalatyn tyńdaý bul joly keshki saǵat 8-ge deıin sozyldy.

Tramptyń advokaty Todd Blansh jalpy alǵanda úsh saǵatqa jýyq, al Manhetten aýdandyq prokýratýrasynyń ókili Djoshýa Steınglass bes saǵattan astam ýaqyt sóıledi.

Olardyń mindeti — prokýrorlar Tramptyń saılaýǵa deıin bıznes jazbalaryn burmalaýdaǵy kinásin dáleldeı aldy ma degen basty suraqqa jaýap berý.

Aıypty nemese aıypty emes dep taný úshin búkil alqabılerdiń biraýyzdan sheshimi qajet.

Tramp taǵylǵan 34 aıyptyń eshqaısysy boıynsha kinásin moıyndamady, sonymen qatar Denıelspen jynystyq qatynasqa túspegenin aıtty.

Blansh Tramptyń kinásiz ekenin, al prokýrorlar eshteńe dáleldeı almaıtynyn aıtty.

Prokýror Djoshýa Steınglass eks-prezıdenttiń advokattaryna bul is boıynsha Maıkl Koenniń bergen aıǵaqtarynan bólek Tramptyń kinásin rastaıtyn «kóptegen dálelder» bar dep qarsylyq bildirdi.

Steınglass sonymen qatar Stormı Denıels ótirik aıtady degen qorǵaýshy taraptyń málimdemesin joqqa shyǵardy.

Onyń aıtýynsha, burynǵy prezıdenttiń advokattary porno aktrısany «ózgertip» qoıǵan.