Trampqa qatysty qastandyq áreketi: er adam ómir boıyna bas bostandyǵynan aıyryldy
ASTANA. KAZINFORM — AQSh-taǵy Florıda shtatynyń soty Donald Trampqa qatysty qastandyq áreketi úshin 59 jastaǵy Raıan Rýtty ómir boıyna bas bostandyǵynan aıyrý úkimin shyǵardy.
Bul oqıǵa 2024 jyldyń 15 qyrkúıeginde Ýest-Palm-Bıch qalasyndaǵy Trump International Golf Club golf klýbynda boldy.
Sol kezde AQSh Qupııa qyzmetiniń agenti taldyń arasynan atys qarýynyń uńǵysyn baıqap qalyp, jasyrynyp turǵan Rýtqa qaraı oq atqan. Osydan keıin kúdikti oqıǵa ornynan qashýǵa tyrysqanymen, kóp uzamaı ustaldy.
Raıan Rýt 15 qyrkúıekte ustalyp, 25 qyrkúıekte oǵan resmı túrde aıyp taǵyldy. Sotta ol bes federaldyq bap boıynsha, ıaǵnı federaldyq qyzmetkerge shabýyl jasaý, sondaı-aq qarýǵa ıelik etý boıynsha birneshe zań buzý dereginde kináli dep tanyldy.
Rýt bul aıyptaýlardyń eshqaısysyn moıyndamaǵan. Onyń advokaty Martın Ross úkimge qarsy shaǵym túsiretinin málimdedi.
— Ol birneshe aı boıy sol kezdegi prezıdenttikke úmitker Trampty óltirýdi josparlady. Ózine kedergi keltiretin kez kelgen adamnyń ómirin qııýǵa daıyn boldy. Sodan beri óziniń áreketine ókinish te bildirgen joq, — dep jazdy sýdıa Aılın Kennon úkim shyǵarý memorandýmynda.
Buǵan deıin habarlanǵandaı, 2024 jyly qyrkúıekte qaıtadan prezıdenttikke úmitker bolǵan Trampqa kezekti márte qastandyq áreketi anyqtaldy.
Eske sala keteıik, 2024 jyly shildede AQSh-tyń Pensılvanııa shtatynda saılaýaldy aktsııa kezinde Donald Trampqa qastandyq jasalǵanyn habarlaǵan edik.
Avtor: Arýjan Jánádil