Trampqa Iranǵa qatysty áskerı jáne ózge de áreket tásilderi tanystyryldy
ASTANA. KAZINFORM - Vashıngtonda Iranǵa baılanysty jaǵdaıdyń shıelenisýi aıasynda qolǵa alynýy múmkin sharalardy talqylaý áli júrip jatyr, dep habarlaıdy Kazinform agenttiginiń menshikti tilshisi.
AQSh prezıdenti Donald Trampqa Iranǵa qatysty áreket etýdiń ártúrli stsenarııleri usynylǵan.
CBS News telearnasynyń eki amerıkalyq sheneýnikke silteme jasap habarlaýynsha, bul nusqalardyń qatarynda tek áskerı amaldar ǵana emes, kıberkeńistiktegi operatsııalar men psıhologııalyq yqpal etý tásilderi de bar. Pentagon Aq úı basshysyna dástúrli áýe soqqylarymen shektelmeıtin, aýqymy keń quraldar jıyntyǵyn tanystyrǵan.
Derekkózderdiń aıtýynsha, kıbershabýyldar men aqparattyq-psıhologııalyq naýqandar áskerı árekettermen qatar júrgizilýi de, bólek iske asýy da múmkin. Alaıda Iranǵa qarsy naqty qandaı qadam jasalatyny jóninde túpkilikti sheshim áli qabyldanǵan joq. Sol sebepti dıplomatııalyq arnalar tolyq áli ashyq kúıinda qalyp otyr.
Osy baǵyttaǵy aqparattarǵa qaraǵanda, AQSh prezıdentiniń ulttyq qaýipsizdik jónindegi komandasy Aq úıde arnaıy jıyn ótkizip, Iran máselesine qatysty jańartylǵan jaýap nusqalaryn talqylamaq. Bul kezdesýge Donald Tramptyń ózi qatysa ma, joq pa — ázirge belgisiz.
Buǵan deıin Tramp amerıkalyq áskerıler «óte qatań nusqalardy» qarastyryp jatqanyn aıtyp, Irandaǵy narazylyqtar kezinde adam shyǵyny tirkelse, jaǵdaıǵa aralasý múmkindigin de joqqa shyǵarmaǵan edi.
Al Aq úıdiń baspasóz hatshysy Karolın Lıvıtt prezıdenttiń «qajet dep tapsa, áskerı amaldardy qoldanýdan taıynbaıtynyn», biraq dıplomatııa áli de basty basymdyq bolyp qala beretinin atap ótti.
.@PressSec on Iran: "The greatest leverage the regime had just several months ago was their nuclear program, which President Trump and the United States military totally obliterated... What President Trump will do next only he knows." pic.twitter.com/LLAiSZToU9
— Rapid Response 47 (@RapidResponse47) January 12, 2026
CBS News dereginshe, osy ýaqytta Iran tarapy da dıplomatııalyq arnalar arqyly kelissózderge daıyn ekenin ańǵartqan. Degenmen, naqty kezdesý ótetini jóninde resmı rastaý ázirge joq.
Aıta keteıik, buǵan deıin Donald Tramp Iranmen yntymaqtasatyn elderge 25 paıyzdyq baj salyǵyn engizetinin málimdegen bolatyn. Sondaı-aq ırandyq dıplomattarǵa Eýroparlamentke kirýge tyıym salynǵany habarlanǵan edi.
