Trampqa ımpıchment jarııalaýǵa shaqyrǵan AQSh ofıtseri Kapıtolıı mańynda ustaldy

AQSh Kapıtolııiniń polıtsııasy Kongreste ótken baspasóz máslıhatynda Tramp pen vıtse-prezıdent Djeı Dı Vensti qyzmetinen shettetý qajet ekenin málimdegen áskerı qyzmetker Djeıson Ýotsondy qamaýǵa aldy.

Іs-sharany Kongreste Trampqa ımpıchment jarııalaý ıdeıasyn qoldap júrgen «Impıchment úshin koalıtsııa» uıymy uıymdastyrdy. Oǵan Tehas shtatynan saılanǵan demokrat, Ókilder palatasynyń múshesi El Grın de qatysty. Ol buǵan deıin birneshe ret AQSh prezıdentine ımpıchment jarııalaý týraly bastama kótergen bolatyn.

— Men búgin osynda El Grınmen birge keldim. Óıtkeni ol — ımpıchment týraly baptardy daýysqa salýǵa batyldyq tanytqan Kongrestegi jalǵyz múshe. Eger Kongress onyń bastamasyn qoldaǵanda, Tramp ákimshiligin tolyq quramymen bılikten shettetýge bolar edi. Alaıda Kongress áli kúnge deıin óziniń anty men mindetiniń mańyzyn tolyq túsinbeı otyr. Sondyqtan biz olardy úzdiksiz ári ymyrasyz azamattyq qarsylyq arqyly áreket etýge májbúrleýimiz kerek, — dedi Djeıson Ýotson.

Kapıtolıı polıtsııasynyń málimdemesinde Kongress múshesi qatyspaǵan jaǵdaıda Kapıtolıı baspaldaǵy mańynda demonstratsııa ótkizýge zań boıynsha tyıym salynatyny aıtylǵan.

Polıtsııa Djeıson Ýotsondy «adamdardyń jınalýyna, qozǵalysqa kedergi keltirýge jáne qoǵamdyq qolaısyzdyq týǵyzýǵa» baılanysty aıyppen ustady.

AQSh áskerı qyzmetkerlerine qarapaıym azamattarǵa qaraǵanda qatań talaptar qoıylady. Áskerı ádilettiń biryńǵaı kodeksine sáıkes, ofıtserlerge prezıdentke, vıtse-prezıdentke, armııa mınıstrine, qorǵanys mınıstrine, Kongreske jáne basqa da birqatar laýazymdy tulǵalarǵa til tıgizýge nemese qorlaıtyn málimdemeler jasaýǵa tyıym salynǵan.

— Áskerı qyzmetshiler minez-qulyqqa jáne áskerı formany kııýge qatysty barlyq zańdar men erejelerdi saqtaýǵa mindetti. Áýe kúshteriniń barlyq jeke quramynan qyzmette de, qyzmetten tys ýaqytta da tártip pen kásibıliktiń eń joǵary standarttaryn ustaný talap etiledi, — dep málimdedi beısenbi kúni AQSh Áýe kúshteriniń ókili.

Barlyq áskerı qyzmetkerlerge, onyń ishinde Áýe kúshteriniń ókilderine áskerı formada saıası qyzmetpen aınalysýǵa tyıym salynǵan.

Djeıson Ýotson Tramp pen Vensti Venesýela men Iranǵa qatysty ákimshilik saıasaty úshin synǵa aldy. Onyń aıtýynsha, bul áreketter «Kongrestiń ókilettigin Konstıtýtsııaǵa qaıshy túrde ıemdený jáne Áskerı ókilettikter týraly zańdy buzý» bolyp sanalady.

— Bul zańbuzýshylyqtardyń saldarynan 13 áskerı qyzmetker qaza taýyp, júzdegen adam jaraqat aldy. Osy úshin prezıdent pen vıtse-prezıdentke ımpıchment jarııalanyp, olar kináli dep tanylyp, qyzmetinen shettetilýi tıis, — dedi Djeıson Ýotson.

Sondaı-aq ol ákimshiliktiń ımmıgratsııalyq saıasaty men qoldanǵan tásilderin Konstıtýtsııaǵa qaıshy dep atady.

Buǵan deıin, bıylǵy 5 naýryzda AQSh-tyń burynǵy teńiz jaıaý áskeri Kongreste Irandaǵy soǵysqa qarsy narazylyq bildirgennen keıin ustalǵan bolatyn. Bul týraly NBC News habarlaǵan.

Oqıǵa AQSh Senatynyń Qarýly kúshter jónindegi kishi komıtetiniń tyńdaýy kezinde bolǵan.

Soltústik Karolına shtatynan AQSh Senatyna Jasyldar partııasy atynan úmitker bolyp otyrǵan 44 jastaǵy áskerı qyzmetker Braıan Makgınnıs tyńdaý barysynda «Eshkim Izraıl úshin soǵysqysy kelmeıdi!» — dep aıqaılaǵan.

— Men Vashıngtonǵa Senattyń áreketine qarsylyǵymdy bildirý úshin keldim. Nelikten olar bizdiń erler men áıelderdi ólimge attandyrmaq, al saılanǵan ókilderimiz dúnıejúzilik soǵys bolmaıdy dep ýáde bergen edi? Úkimetimizden kóńili qalǵan, ózin satqyndyqqa ushyradym dep sanaıtyn kez kelgen adamǵa aıtarym — siz jalǵyz emessiz. Bizge qosylyńyzdar, osy satqyndyq úshin ádildik talap etińizder, — dedi ol sársenbi kúni tańerteń X áleýmettik jelisinde jarııalaǵan beıneúndeýinde.

Kapıtolıı polıtsııasynyń málimdemesinde Makgınnıs «tyńdaý kezinde zańsyz narazylyq aktsııasyn bastap, ózgelerdiń qaýipsizdigine qater tóndirgen, polıtsııa qyzmetkerleriniń ony zaldan shyǵarýyna belsendi qarsylyq kórsetken» adam retinde sıpattalǵan.

— Kongress ǵımarattarynda narazylyq aktsııalaryn ótkizýge tyıym salynǵan. Kapıtolıı aýmaǵynda demonstratsııa ótkizýge ruqsat etilgen basqa oryndar jetkilikti, — dep málimdedi polıtsııa.

Braıan Makgınnıske polıtsııa qyzmetkerine shabýyl jasaý boıynsha úsh, qamaýǵa qarsylyq kórsetý jáne zańsyz demonstratsııa ótkizý boıynsha taǵy úsh aıyp taǵyldy.

Buǵan deıin Izraıl premer-mınıstri Bınıamın Netanıahý AQSh tarapynan Izraılge kórsetiletin qarjylyq qoldaýdy toqtatýǵa nıetti ekenin málimdedi. Ol el ekonomıkasy qazir Amerıkanyń qoldaýynsyz ómir súre alatyndaı kúshti ekenin alǵa tartty.