Trampqa ımpıchment jarııalaý týraly qaýly jarııalandy

NUR-SULTAN. QazAqparat – Tramptyń ımpıchmenti kúshine endi. Sońǵy sóz Senatta bolmaq, dep habarlaıdy QazAqparat VVS -ge silteme jasap.

Prezıdent Trampqa ımpıchment jarııalaý týraly qaýlyǵa Ókilder palatasynyń spıkeri Nensı Pelosı qol qoıdy.

Prezıdent Donald Tramp AQSh tarıhyndaǵy eki ret ımpıchment jarııalanǵan alǵashqy memleket basshysy boldy. Bul sheshimdi maquldaýy tıis Senat jańa prezıdent ınaýgýratsııasynan keıin aıyptaýlardy qarastyrmaq.

Sársenbi kúni keshke Kongrestegi demokrattar ketip bara jatqan prezıdentti ımpıchment protsesin tez arada ótkizý týraly ýádesin oryndady.

Birneshe saǵat ishinde Ókilder palatasy prezıdent Tramptyń aıyptaýlarynyń jalǵyz babyn qarap, maquldady, ony búlikke ıtermelegeni úshin kináli dep jarııalady.

Impıchment Palata spıkeri Nensı Pelosı qujatqa qol qoıǵannan keıin kúshine endi. Alaıda túpkilikti sheshimdi Senat qabyldaýy kerek.

Bir kún buryn Kapıtolıı ǵımaratynyń aınalasyna AQSh Ulttyq gvardııasynyń 15 myń qarýly jaýyngeri ornalastyryldy. Keıbir zań shyǵarýshylar atap ótkendeı, bul Irak pen Aýǵanstandaǵy amerıkalyq áskerı kontıngentten de kóp.

Ondaǵan sarbazdar Kongress dálizderinde edende otyrdy, sondyqtan zań shyǵarýshylardyń biri jýrnalısterge bul ǵımarat ásker kazarmasyn eske salatynyn aıtty.

Eske salsaq, buǵan deıin AQSh Kongresine Tramp ımpıchmenti týraly rezolıýtsııa usynylǵan bolatyn.
6 qańtarda AQSh kongresi saılaýshylardyń daýsyn eseptep, 2020 jylǵy prezıdent saılaýynyń qorytyndysyn shyǵarý úshin jınalǵan bolatyn. Osy kúni Donald Tramp jaqtastarynyń jappaı narazylyq aktsııasynan keıin oǵan qatysýshylardyń bir toby kongress ǵımaratyna basyp kirdi.