Trampqa Ilona Maskty AQSh-tan shyǵaryp jiberýge keńes berildi
ASTANA. KAZINFORM — Donald Tramptyń birinshi prezıdenttik merziminde Aq úıde aǵa keńesshi bolǵan Stıv Bennon sońǵy aılarda Maskpen qaqtyǵysyp qalǵan edi. Ol beısenbi kúni Maskqa qatysty birqatar máseleler boıynsha tergeý júrgizýdi jáne onyń barlyq memlekettik kelisimsharttaryn toqtatýdy usyndy.
— Onyń ımmıgratsııalyq mártebesin resmı tekserý kerek, óıtkeni men ony zańsyz mıgrant dep sanaımyn jáne ony elden dereý deportatsııalaý qajet dep esepteımin, — dedi Bennon The New York Times gazetine bergen suhbatynda.
NBC News atap ótkendeı, Donald Tramp pen Ilon Mask arasyndaǵy shıelenis jeke aıyptaýlar men qoqan-loqylarǵa ulasty.
Qaqtyǵys AQSh prezıdentiniń Tesla kompanııasynyń bas dırektory Kongrestegi respýblıkashylardyń zań jobasyn synaǵanyna jaýap retinde bastalyp, keıin áleýmettik jelilerdegi aıyptaýlar legine aınaldy.
— Men qatty renjidim, óıtkeni Ilon bul zań jobasynyń ishki mehanızmderin jaqsy biletin. Men oǵan kóp qoldaý kórsettim, sondyqtan onyń bul áreketi kóńilimdi qatty qaldyrdy, — dedi Donald Tramp.
Tramptyń aıtýynsha, Masktyń ashý-yzasy zań jobasynda elektromobılder satyp alýdy yntalandyrýǵa arnalǵan salyqtyq jeńildikterdiń qysqartylýyna baılanysty týyndaǵan.
— Ilon renjidi, óıtkeni biz elektromobılderge sýbsıdııalardy shekteıtin talap engizdik. Bul elektromobılder óndirýshileri úshin úlken soqqy boldy. Olar bizden mıllıardtaǵan dollar kóleminde sýbsıdııa talap etedi. Ilon muny áý bastan bildi, — dedi Tramp.
Tesla — AQSh-taǵy eń iri elektromobıl óndirýshi kompanııa. Sońǵy aılarda kompanııanyń satylymy tómendedi, bul jahandyq básekelestiktiń kúsheıýi men Masktyń saıası belsendiligine baılanysty keri áserdiń belgisi. Jyldyń basynan beri Tesla aktsııalary 20 paıyzdan astam arzandady.
— Eger men bolmasam, Tramp saılaýda jeńiler edi, demokrattar Ókilder palatasyn baqylaýǵa alar edi, al Senatta respýblıkashylardyń artyqshylyǵy 51-49 bolar edi. Bul — naǵyz raqmetsizdik, — dedi Ilon Mask.
Tramp bolsa Truth Social jelisinde Maskty «esi aýysqan» dep atap, federaldy úkimet Masktyń kompanııalarymen jasalǵan mıllıardtaǵan dollarlyq kelisimsharttardy buzý máselesin qarastyryp jatqanyn aıtty.
Qaqtyǵys barysynda Tramp: «Men Ilonnyń menen teris aınalǵanyna renjimeımin, biraq ol muny áldeqashan jasaýy kerek edi», — dedi.
Kóp uzamaı Mask áleýmettik jelide Tramppen kúreste jeńiske jetetinin jáne prezıdentke ımpıchment jarııalap, onyń ornyna Djeı Dı Vensti qoıý kerek ekenin jazdy.
Buǵan deıin Ilon Mask Donald Tramptyń zań jobasyn ashyq synǵa alǵan bolatyn.
Tramp pen Masktyń jarııa qaqtyǵysynan keıin olardyń aktsııalary qunsyzdandy.