Tramp jumys vızasynyń tólemin 100 000 dollarǵa deıin kóterdi

ASTANA. KAZINFORM — AQSh prezıdenti Donald Tramp qol qoıǵan jarlyqqa sáıkes, eger sheteldik azamatty jumysqa shaqyrǵan kompanııa úkimetke tıisti tólem jasamasa, H-1B vızasyna ıe mamandardyń AQSh-qa kirýine shekteý qoıylady, dep jazady DW.

— Kompanııa bul adam úkimetke jylyna 100 000 dollar tóleýge turarlyqtaı qundy ma, joq álde ol eline qaıtyp, onyń ornyna amerıkalyqty jaldaǵan jón be — sony sheshýi kerek, — dedi AQSh-tyń saýda mınıstri Govard Lıýtnık jýrnalısterge bergen túsiniktemesinde.

H-1B vızasy iri tehnologııalyq kompanııalar arasynda tanymal. Olar bul vızany shetelden bilikti mamandardy jumysqa tartý úshin paıdalanady. Buǵan deıin vıza alý úshin tólenetin ákimshilik alym shamamen 1500 dollardy quraıtyn.

Ótken jyly H-1B baǵdarlamasy aıasynda maquldanǵan ótinishterdiń 71%-y úndistandyq azamattarǵa tıesili boldy. Úndistannyń Syrtqy ister mınıstrligi bul sharanyń «otbasylardyń ajyraýyna alyp keletin gýmanıtarlyq saldary bolýy múmkin» dep alańdaýshylyq bildirdi.

BAQ-tyń habarlaýynsha, Amazon men Microsoft kompanııalary jańa nusqaýlar shyqqansha H-1B vızasymen AQSh-ta júrgen qyzmetkerlerine elden shyqpaýǵa keńes berdi.

Sol kúni Donald Tramp taǵy bir jarlyqqa qol qoıyp, sheteldikterge 1 mıllıon dollar tólegen jaǵdaıda «Trump Gold Card» dep atalatyn AQSh-ta turaqty turýǵa ruqsat (Green Card) alý múmkindigin berdi.

Osyǵan deıin AQSh soty Tramptyń New York Times gazetine qarsy shaǵymyn ýaqytsha keıinge qaldyrǵanyn jazǵan edik.