Tramp joǵary laýazymdarǵa tańdaǵan azamattarǵa qoqan-loqy kórsetildi

ASTANA.KAZINFORM - Tramp ákimshiligine úmitker birneshe adamǵa shabýyl jasalyp, qoqan-loqy kórsetildi, dep jazady NBC News.

Qaýip tóndirilgeni týraly habarlamalar Donald Tramp AQSh-tyń jańa ákimshiligindegi basshylyq laýazymdarǵa tańdaǵan birqatar adamdardan keldi.

BUU-daǵy elshi qyzmetine saılanǵan Elıza Stefanık úıine jarylǵysh zat qoıylǵany týraly habarlama alǵan.

Bolashaq Qorshaǵan ortany qorǵaý agenttiginiń basshysy Lı Zeldın ózin jáne otbasyn nysanaǵa alatyn qoldan jasalǵan jarylǵysh zat qaýpi týraly habarlama alǵanyn aıtty.

Aýyl sharýashylyǵy mınıstrliginiń basshysy laýazymyna úmitker Brýk Rollıns «X» áleýmettik jelisinde úıi men otbasyna qaýip tóngenin, polıtsııanyń jedel áreketiniń arqasynda aman qalǵanyn jáne úılerine oralǵanyn jazdy.

Buǵan deıin AQSh-tyń bas prokýrory laýazymyna saılanǵan Mett Getts te úıinen bomba tabylǵany týraly habar alǵan. Donald Tramp keıinirek AQSh ádilet mınıstrliginiń basshysy qyzmetine Pem Bondıdi tańdady.

Donald Tramp qorǵanys mınıstri qyzmetine saılaǵan Pıt Hegset X áleýmettik jelisinde polıtsııanyń otbasyna qaýip tónip turǵanyn eskertkenin habarlady.

Quqyq qorǵaý organdary bul qoqan-loqylardyń jalǵan ekenin, esh jerden jarylǵysh zat tabylmaǵanyn aıtty.