Tramp jobasynan keıin Lınkoln basseınin baldyr basyp, jaryq paıda boldy
ASTANA. KAZINFORM — Vashıngtonda Lınkoln memorıaly janyndaǵy aına tárizdi basseındi qaıta jańǵyrtý jumystaryna 14 mln dollardan astam qarjy jumsalǵan. Alaıda bul joba úlken saıası jáne ekologııalyq janjalǵa aınaldy, dep habarlaıdy Associated Press.
Jańa jabyn qabyrshaqtanyp túse bastaǵannan keıin sý baldyrmen qaptalyp, al mańaıynan óli úırekter tabylǵan. Bul jaǵdaıdan soń, prezıdent Donald Tramp nysandy búldirdi degen kúdikpen 6 adamnyń ustalǵanyn málimdedi.
Seısenbi kúni Tramp áleýmettik jelide basseınniń túbinde 350 fýt (shamamen 107 metr) jyryq paıda bolǵanyn habarlady. Prezıdent taǵy da buzaqylardy aıyptap, ony dáleldeıtin fotosýretter jarııalaıtynyn ýáde etti. Alaıda seısenbi keshine deıin eshqandaı foto nemese beıne usynylǵan joq.
Tramptyń aıtýynsha, bul qasaqana jasalǵan. Sondaı-aq ol basseınge keltirilgen zalalǵa qatysty taǵy 7 adamǵa aıyp taǵylǵanyn málimdedi.
— Bul qasaqana jáne qylmystyq jolmen jasaldy — bireý osyndaı zalal keltirý úshin kóp kúsh jumsady, — dep jazdy prezıdent.
Alaıda Ulttyq saıabaqtar polıtsııasy men AQSh Іshki ister mınıstrligi vandalızm jáne ustalǵandar týraly málimdemelerdi resmı túrde rastaǵan joq.
Qaıta jańǵyrtý kezinde ne boldy?
Tramp bul basseındi mereıtoılyq is-sharalarǵa deıin tolyq jańartamyn dep ýáde bergen. Onyń ishindegi sýy tógilip, túbi qara kók boıaýmen boıalǵan, ony prezıdent «Amerıka týynyń túsi» dep ataǵan.
Biraq jumystar aıaqtalǵannan keıin kóp uzamaı basseın tez baldyr basyp, jańa jabyn qabyrshaqtana bastaǵan.
Joba merdigeri — Atlantic Industrial Coatings kompanııasy — aqaýlar bar ekenin moıyndady, biraq zaqymdanǵan bólikter búkil nysannyń óte shaǵyn bóligi ekenin atap ótti.
Jóndeý jumystary sý qaıtadan tógilgennen keıin, kepildik mindettemeler aıasynda júrgiziletini aıtyldy.
Tehnıkalyq másele qaýipsizdik máselesine aınaldy
Prezıdenttiń vandalızm týraly málimdemelerinen keıin basseın mańynda kúzet kúsheıtildi. Nysanǵa ulttyq gvardııa men ulttyq parkter polıtsııasynyń patrýlderi tartylyp, jumysshylar qorshaýlar ornata bastady.
Associated Press málimetinshe, ustalǵan er adamdardyń biri jabynnyń qabyrshaqtanyp turǵan bóligin tek qolymen ustap kórgenin, sodan keıin park qyzmetkeriniń talabymen dereý qolyn alǵanyn aıtqan.
Ekologter talaby
Bul jaǵdaıǵa úırekterdiń qyrylyp qalǵany týraly habarlardan keıin taǵy da nazar aýdaryldy. Baldyr basqan basseıniń ishinde de syrtynda da úırektiń ólekseleri tabyldy.
Center for Biological Diversity uıymy balyq jáne jabaıy tabıǵatty qorǵaý federaldy qyzmetinen tergeý júrgizýdi jáne Migratory Bird Treaty Act erejeleriniń saqtalýyn tekserýdi talap etti.
— Amerıkanyń 250 jyldyǵyna oraı aına tártizdi basseındi úırekter úshin úlken tuzaqqa aınaldyrý — bul qatygez, aqymaq jáne ózimshil áreket, — dedi uıym ókili Tara Zýardo.
Jabaıy janýarlardy qutqarý jáne zertteýmen aınalysatyn City Wildlife uıymy úırekterdiń qyrylýynyń naqty sebebin anyqtaı almaıtynyn, sebebi ólekseler saraptamaǵa túspegenin habarlady.
Nege basseın qaıtadan jasyl túske endi
Mamandar baldyrlardyń qarqyndy kóbeıýine qara tústiń áseri bolýy múmkin ekenin aıtady. Qara jabyn jaryqty kóbirek sińirip, sýdyń qatty qyzýyna jáne baldyrlardyń kóbeıýine qolaıly jaǵdaı týǵyzady.
Sońǵy kúnderi jumysshylar baldyrlardyń kóbeıýin toqtatý úshin basseınge sýtegi totyǵyn quıyp jatyr. Alaıda sarapshylar bul zattyń boıaý qabatyna da áser etýi múmkin ekenin eskertti.
Mereıtoı aldyndaǵy jańa jóndeý
Tramp basseındegi sýdyń bir bóligi taǵy da 4 shildege deıin nemese keıin tógiletinin, sodan soń kúrdeli jóndeý júrgiziletinin málimdedi. Jumystyń aýqymy men quny áli jarııalanǵan joq.
Osylaısha, AQSh-tyń 250 jyldyq mereıtoıynyń sımvoldarynyń biri bolýy tıis nysan saltanat shara bastalmaı turyp-aq saıası jáne ekologııalyq daýǵa aınaldy.
Eske sala keteıik, AQSh-ta maldy tirideı jeıtin qaýipti parazıt kóbeıip jatyr.
