Tramp jeti federaldyq agenttikte qysqartý júrgizýdi buıyrdy
ASTANA. KAZINFORM – AQSh prezıdenti Donald Tramp ózi qolǵa alǵan memlekettik bıýrokratııamen kúres jumystary aıasynda jeti federaldyq agenttikte shtat sanyn aıtaralyqtaı qysqartýǵa buıryq berdi, dep habarlaıdy VVS.
Aq úı saıtynda jarııalanǵan jarlyqta zańǵa sáıkes ózderiniń jarǵylyq qyzmetterin atqarýdy toqtatý jáne qyzmetkerler sany men olardyń qyzmetterin barynsha qysqartýy tıis mekemelerdiń tizimi berilgen.
Olardyń arasynda «Azat Eýropa/Azatttyq radıosy jáne Amerıka daýysyn» qosa alǵanda bes amerıkalyq medıa-korporatsııany úılestiretin AQSh-tyń jahandyq medıa jónindegi agenttigi (USAGM) bar.
Sonymen qatar tizimge Mýzeı jáne kitaphanalardy basqarý qyzmeti, Azshylyqtar bıznesin damytý agenttigi, AQSh-tyń baspanasyzdyqpen kúres jónindegi vedomstvoaralyq keńesi jáne basqalar kirgen.
Tramp jarlyǵynda qujat jarııalanǵan kúnnen, ıaǵnı 21 naýryzdan bastap, jeti kún ishinde agenttiktiń basshylary Menedjment jáne bıýdjet jónindegi basqarmaǵa jarlyqtyń qysqartý men bıýdjetti qaıta qurylymdaý jónindegi talaptarynyń tolyq oryndalǵanyn rastaıtyn esep usynýy kerek.
Jýrnalısterdi qorǵaý komıteti AQSh Kongresiniń basshylyǵyn USAGM-dy Tramptyń jarlyǵynyń saldarynan qorǵaý úshin shara qoldanýǵa shaqyrdy.
USAGM 49 tilde jumys isteıtin habar taratý kompanııalarynyń jumysyn úılestiredi. Al olardyń barlyǵynyń aptalyq aýdıtorııasy 361 mln adamdy quraıdy. Onyń bıýdjetine 2025 jyly 950 mln dollar qajet boldy.
Osyǵan deıin AQSh USAID-ty nege taratqaly jatqany týraly saraptama jarııalaǵan edik.