Tramp jel energetıkasyn damytý baǵdarlamasyn toqtatty

ASTANA. KAZINFORM — AQSh prezıdenti «offshorlyq jel energetıkasyna» qatysty jobalar boıynsha jumysty toqtatýǵa buıryq berdi, dep habarlaıdy Euronews. 

Muhıt energetıkasyn basqarý bıýrosy (BOEM) Tehas, Lýızıana, Men, Nıý-Iork, Kalıfornııa jáne Oregon jaǵalaýlarynda, sondaı-aq ortalyq Atlant muhıtynda týrbına salý úshin 1,42 mln gektardan astam jerdi bólý týraly sheshimin ózgertti.

Bul — Donald Tramp ákimshiliginiń eldiń energetıkalyq saıasatyndaǵy ózgeristi tanytatyn kezekti qadam.

Ótken jyly AQSh-tyń sol kezdegi prezıdenti Djo Baıden jel energetıkasyn damytý úshin federaldy qaırańdy aımaqtardy jalǵa alýdyń bes jyldyq kestesi týraly jarııalady.

Alaıda Tramp qyzmetine kiriskennen beri burynǵy basshynyń sheshimderin birtindep ózgertti. Osylaısha, ol munaı, gaz jáne kómir óndirýdi ulǵaıtýǵa baǵyttalǵan birqatar atqarýshy buıryqtarǵa qol qoıdy.

Ótken aptada AQSh Іshki ister mınıstri Dag Býrgým senimsiz dep atalǵan jel jáne kún elektr stantsııalary úshin jeńildik rejımi toqtatylatynyn jarııalady. 

Sondaı-aq energııany damytýdy jerdi paıdalanýdyń basqa túrlerimen teńestirý úshin qurlyqtaǵy jel áleýeti joǵary federaldyq jer ýchaskelerin alyp qoıý máselesi qarastyrylyp otyr. 

Aq úı basshysynyń qazba otyndy paıdalaný baǵdarlamasy buǵan deıin klımat ǵalymdary men ekologterdiń synyna ushyraǵan bolatyn.

Olar AQSh Energetıka mınıstrligin klımattyń ózgerýi men jahandyq jylyný máselelerin, sondaı-aq búkil álemdegi klımattyq apattar men ekstremaldy aýa raıy jaǵdaılaryn elemeıdi dep aıyptap otyr. 

Shotlandııaǵa sapary kezinde Tramp Eýropalyq komıssııa tóraıymy Ýrsýla fon der Lıaıenmen ótken baspasóz máslıhatynda jel energııasyn «jumys istemeıtin» «alaıaqtyq» dep atady.

Buǵan deıin kún energııasy alǵash ret EO-da negizgi energııa kózine aınalǵanyn jazǵan bolatynbyz.