Tramp: jasandy túsik jasaǵany úshin áıelderdi emes, dárigerlerdi jazalaý kerek
ASTANA. QazAqparat - AQSh prezıdenttigine Respýblıkalyq partııanyń atynan úmitker Donald Tramp jasandy túsikke baılanysty aıtqan sózderi óz jaqtastarynyń da, jasandy túsik jasatýǵa qarsy shyqqandardyń da tarapynan birdeı keri reaktsııa týdyrǵan soń, óz pozıtsııasyn túzetti.
Atap aıtqanda, Tramp jasandy túsik jasatýǵa tyıym salý nemese zańdastyrý týraly sheshimderdi federaldyq bılik emes, jekelegen shtattardyń bıligi qabyldaý tıis ekenin málimdedi. Bul rette ol jalpy alǵanda AQSh-ta jasandy túsik jasatýǵa tyıym salý ıdeıasyn qoldaıtynyn aıtqan bolatyn.
Budan basqa, Tramp jasandy túsik jasatýǵa tyıym salý jaǵdaıynda ony jasatý úshin kimniń qylmystyq jazaǵa tartylýy tıis ekeni jóninde pikirin ózgertti. Bastapqyda ol osyndaı qadamǵa barǵan áıelderdiń ózderin jazalaý kerek ekenin aıtsa, endi astyrtyn jasandy otany jasaýǵa kelisken dárigerlerdi jaýapqa tartý kerek ekenin alǵa tartyp otyr.
Tramp buǵan deıingi pikirin MSBNC telearnasyna bergen suhbatynda aıtqan. Ol kezde prezıdenttikke úmitker el aýmaǵynda jasandy túsik jasatýǵa tyıym salýdy qoldaıtynyn málim etken edi, dep jazady Bı-bı-sı.
