Tramp janjaldy 24 saǵat ishinde aıaqtaý týraly málimdemesine qatysty pikir bildirdi

ASTANA. KAZINFORM — Donald Trampqa «Reseı men Ýkraına qaqtyǵysyn 24 saǵat ishinde sheshe alamyn dep nege aıttyńyz?» degen saýal qoıyldy, dep habarlaıdy BBC.

Donald Tramp saılaý naýqany kezinde Reseı men Ýkraına arasyndaǵy qaqtyǵysty 24 saǵat ishinde sheshe alatynyn birneshe ret aıtqan edi. Bul kóptegen adamǵa shyndyqqa janaspaıtyn másele bolyp kórindi jáne ol áli oryndalmady. Degenmen Full Measure baǵdarlamasynyń júrgizýshisi Sherıl Attkısson bul týraly AQSh prezıdentinen tikeleı surady. Bul jeksenbide tolyq kórsetiletin suhbattyń anonsynda kórsetilgen.

— Sol kezde mysqyldap aıttym, — dep jaýap berdi Tramp. — Meniń naqty aıtqym kelgeni — bul qaqtyǵystyń sheshilgenin qalaımyn. Meniń qolymnan keledi dep oılaımyn.

Sonymen qatar baǵdarlama anonsynda Tramp Reseımen atysty toqtatý týraly kelissózder áli de jaqsy júrip jatqanyn aıtty.

— Dúısenbide bul jaıynda kóbirek bilemiz, jaqsy bolady dep úmittenemiz, — dep qosty Tramp neni meńzegenin ashyp aıtpaı.

Eske salsaq, osyǵan deıin Tramptyń arnaıy ókili Ýkraınadaǵy soǵysty 24 saǵatta toqtatý jóninde pikir bildirgen edi.

Sondaı-aq Tramp Máskeý men Kıevti beıbit kelissózderdi bastaýǵa shaqyrǵanyn jazdyq.