Tramp jala japqany úshin BBC-di sotqa berdi

ASTANA.KAZINFORM — AQSh prezıdenti Donald Tramp dúısenbi kúni BBC korporatsııasyna qarsy ar-namysy pen qadir-qasıetin qorǵaý jóninde sotqa talap-aryz túsirdi, dep jazdy Sınhýa.

Ol brıtandyq habar taratý korporatsııasyn Kapıtolııdegi tártipsizdikterge qatysty óz sózin burmalap, durys óńdemedi dep aıyptap otyr.

BAQ málimetinshe, Donald Tramp keminde 5 mıllıard AQSh dollary kóleminde ótemaqy talap etken.

Sotqa júginer aldynda Aq úıdegi Oval kabınetinde jýrnalısterge bergen túsiniktemesinde Tramp:

— Olar taban astynda meniń aýzyma sóz saldy. Men eshqashan aıtpaǵan sózderdi aıtqandaı etip kórsetti, — dedi.

Eske sala keteıik, Donald Tramp BBC tilshilerin 2024 jylǵy AQSh prezıdent saılaýynyń qorytyndysyna áser etýge tyrysty dep aıyptaǵan edi.

Sol kezde Tramp: 

— BBC-degi basty tulǵalar, sonyń ishinde bastyǵy Tım Deıvı 6 qańtarǵa qatysty meniń óte jaqsy (minsiz!) sózimdi burmalaǵany úshin jumystan shyǵaryldy. The Telegraph-qa osy jemqor «tilshilerdi» áshkerelegeni úshin rahmet. Bular prezıdent saılaýynyń qorytyndysyna áser etýge tyrysqan opasyz adamdar. Onyń ústine, olar kóptegen adamdardy bizdiń basty odaqtasymyz dep sanaıtyn basqa eldiń týmalary. Bul – demokratııa úshin sumdyq jaǵdaı, — dep Truth Social-ǵa jazǵan bolatyn.

The Daily Telegraph málimetinshe, BBC-diń ótken jyldyń qazan aıynda AQSh prezıdent saılaýy qarsańynda efırge shyqqan Panorama baǵdarlamasynda Tramp sózi AQSh Kapıtolııin basyp alýǵa shaqyryp jatqanyn kórsetetindeı etip óńdelgen, al shyn máninde ol azamattyq kózqarastardy beıbit jolmen bildirý qajettiligi týraly aıtqan. Aq úıdiń baspasóz hatshysy Kerolaın Lıvıtt buǵan deıin BBC-di jalǵan aqparat berdi dep aıyptaǵan.