Tramp: Zelenskıımen kelisimge kelý Pýtınge qaraǵanda áldeqaıda qıyn

ASTANA. KAZINFORM – AQSh prezıdenti Donald Tramp Ýkraına prezıdenti Vladımır Zelenskııdi taǵy da synǵa alyp, NBC News telearnasyna bergen suhbatynda ýkraınalyq kóshbasshymen kelisimge kelý Reseı prezıdenti Vladımır Pýtınmen salystyrǵanda áldeqaıda qıyn ekenin aıtty.

Tramp bul pikirin birneshe eýropalyq kóshbasshynyń Reseı munaıyna qarsy sanktsııalardy ýaqytsha toqtatý týraly sheshimine kúmán keltirgen synyna jaýap berý barysynda bildirdi.

AQSh Iranǵa qarsy áskerı operatsııa bastalǵannan keıin kúrt qymbattap ketken energııa tasymaldaýshylarynyń baǵasyn tómendetý maqsatynda tankerlerde turǵan reseılik munaıdy satýǵa ruqsat bergen.

Aq úı basshysy «álemge tek munaı bergim keledi» dep málimdedi. 

– Maǵan munaı kerek. Daǵdarys aıaqtalǵannan keıin sanktsııalar birden qaıta engiziledi, — dedi ol.

Osydan keıin Tramp Ýkraına prezıdentin synǵa aldy.

– Zelenskııdiń kelisim jasaǵysy kelmeıtinine tańǵalamyn. Zelenskııge aıtyńdar, kelisimge barsyn, óıtkeni Pýtın mundaı qadamǵa daıyn, — dedi ol.

Qazirgi ýaqytta Reseı Ýkraına áskerin Donbass aýmaǵynan tolyq shyǵarýdy talap etýdi jalǵastyryp otyr. Al Ýkraına bul talapty qabyldaýǵa bolmaıtyn shart dep sanaıdy.

AQSh, Reseı jáne Ýkraına qatysýymen ótedi dep josparlanǵan úshjaqty beıbit kelissózder Taıaý Shyǵystaǵy jańa soǵysqa baılanysty keıinge shegerilgen.

Sonymen qatar NBC News telearnasyna bergen suhbatynda Tramp Kıevtiń Iran drondarymen kúreste AQSh-qa kómek kórsetý týraly usynysyn da qabyldamady.

Onyń aıtýynsha, «ózderine eshqandaı kómek qajet emes».

Aıta keteıik, buǵan deıin AQSh-tyń arnaıy ókili Ýıtkoff Zelenskıı men Pýtınniń jeke kezdesý múmkindigi týraly aıtqan.