Tramp Zelenskııdi synap tastady

ASTANA. KAZINFORM — AQSh prezıdenti Donald Tramp Ýkraına lıderi Vladımır Zelenskııge qatysty sózderin kúsheıtip, ony reıtıngi tómen ekenin jáne elde saılaýdyń ótpegeni úshin ekinshi ret aıyptady, dep habarlaıdy VVS. 

Tramp Zelenskııdi «dıktator» dep atap, eldi qutqarý úshin tez arada bitimgershilik kelisimin jasaýdy talap etti.

Tramp bir kún buryn bul týraly Florıdadaǵy Mar-a-Lago rezıdentsııasynda tilshilerge aıtqan edi, al sársenbi kúni tańerteń ol Truth Social saıtynda jazba qaldyrdy. 

Amerıka prezıdenti jazbasynyń basynda «Qarapaıym jetistikterge qol jetkizgen komedııashy» Zelenskıı jeńýi múmkin emes jáne eshqashan bastalmaýy kerek soǵyspen kúresý úshin AQSh-ty 350 mlrd dollar jumsaýǵa sendirgenin jazdy.

Tramptyń sózinshe, Qurama Shtattar Eýropadan 200 mlrd dollar kóp jumsady jáne bul rette Eýropanyń aqshasyna «kepildik berilgen» bolsa, al AQSh onyń ornyna eshteńe almaıdy. Zelenskıı bolsa, «biz oǵan jibergen aqshanyń jartysy joǵalyp ketkenin» moıyndady, — deıdi Tramp.

AQSh prezıdenti Ýkraına basshysyn «saılaýdy ótkizýden bas tartty» dep aıyptap, Ýkraınadaǵy saýalnamalarda Zelenskııdiń reıtıngi óte tómen ekenin jáne «ol jaqsy bolǵan jalǵyz nárse» — Djo Baıdenge aıla-sharǵy jasaǵanyn («ol Baıdenmen skrıpka sııaqty oınady») aıtty.

— Saılaýsyz dıktator Zelenskıı tez áreket etýi kerek, áıtpese ol elsiz qalady. Osy arada biz Reseımen soǵysty toqtatý týraly kelissózderdi sátti júrgizip jatyrmyz, óıtkeni muny tek Tramp pen onyń ákimshiligi jasaı alatynyn bári moıyndaıdy, — dep túıindedi Tramp.

Tramp bir kún buryn atap ótkendeı, Ýkraınada áskerı jaǵdaı kúshinde. Ýkraına zańnamasy áskerı jaǵdaı kezinde saılaý ótkizýge tyıym salady.

Zelenskııdiń málimetinshe, «Reseıdiń Ýkraınaǵa qarsy soǵysy 320 mlrd dollar «turǵan», onyń 200 mıllıardyn AQSh pen EO tólegen». 

— AQSh búginde bizge jalpy alǵanda shamamen 60 mlrd berdi, al biz taǵy 31,5 mlrd aldyq, — dedi Ýkraına prezıdenti sársenbide. 

Germanııa kantsleri Olaf Sholts «saılaýsyz dıktator» degen sózdi synady, dep jazdy Spiegel.

— Prezıdent Zelenskııge demokratııalyq legıtımdilikten bas tartqyzý durys emes jáne qaýipti, — dep málimdedi Sholts.

Buǵan deıin Tramp Pýtınmen aqpannyń sońyna deıin kezdesýi múmkin ekenin málimdedi.