Tramp, Zelenskıı men Eýropa kóshbasshylarynyń Aq úıdegi kezdesýi: kelissóz qalaı ótti
ASTANA. KAZINFORM — AQSh prezıdenti D. Tramppen kelissózderge qatysqan eýropalyq kóshbasshylardyń kópshiligi Aq úıden tarqasty, dep habarlaıdy Kazinform agenttiginiń menshikti tilshisi.
AQSh astanasyna Ýkraına prezıdenti V. Zelenskıı, Frantsııa prezıdenti E. Makron, Fınlıandııa prezıdenti A. Stýbb, Ulybrıtanııa premer-mınıstri K. Starmer, Italııa premeri Dj. Melonı, Germanııa kantsleri F. Merts, Eýropalyq komıssııa prezıdenti Ý. Lıaıen jáne NATO Bas hatshysy M. Rıýtte keldi.
Tramppen kelissózderge deıin keıbir EO kóshbasshylary men Vladımır Zelenskıı qysqasha kezdesý ótkizdi.
Eń aldymen Aq úıge Ýkraına prezıdenti Vladımır Zelenskıı keldi. Jeke formattaǵy kelissózderge deıin Zelenskıı men Tramp kóptegen jýrnalısterdiń suraqtaryna jaýap berdi.
Keıin Ýkraına jáne AQSh kóshbasshylary arasyndaǵy kelissózderden soń, Eýroodaqtan kelgen qonaqtar da olarǵa qosyldy.
Aq úıdegi kezdesýler qorytyndysy boıynsha Donald Tramp áleýmettik jelide Ýkraına daǵdarysyn retteýge baılanysty aldaǵy qadamdardy jarııalaǵan jazba jarııalady. Ol dúısenbi kúni Reseı prezıdenti Vladımır Pýtınmen telefon arqyly sóıleskenin jáne Zelenskıımen kezdesý daıyndyǵyn bastaǵanyn rastady.
— Kezdesý barysynda biz Ýkraınaǵa qaýipsizdik kepildikteri týraly sóılestik. Bul kepildikter ártúrli eýropalyq elder tarapynan AQSh-pen úılestirý arqyly beriledi. Barlyǵy Reseı men Ýkraına arasyndaǵy beıbitshilikke qol jetkizý múmkindigine qýanyshty. Kezdesýler aıaqtalǵan soń men prezıdent Pýtınge qońyraý shalyp, Pýtın men Zelenskııdiń kezdesýine daıyndyqty bastadym, — dep jazdy Aq úı basshysy Trurt Social jelisinde.
Tramptyń aıtýynsha, budan keıin onyń, Reseı jáne Ýkraına prezıdentteriniń qatysýymen úshjaqty kezdesý ótkizý de múmkin.
Sondaı-aq, Tramp AQSh vıtse-prezıdenti Dj. Vens, Memlekettik hatshy M. Rýbıo jáne Arnaıy ókil S. Ýıtkoff Kıev pen Máskeýmen ózara árekettesýdi úılestiretinin aıtty.
Óz kezeginde Zelenskıı Aq úıde Tramppen jáne Eýropa ókilderimen qaýipsizdik kepildikterin talqylaǵanyn aıtyp, AQSh tarapynan mańyzdy belgiler alǵanyn jetkizdi. Onyń aıtýynsha, mundaı kepildikterdiń egjeı-tegjeıi 10 kún ishinde naqty josparlanatyn bolady.
— Munyń bári jazbasha túrde 7–10 kún ishinde rásimdeledi, — dedi Zelenskıı kelissózderden keıin.
Ol bul kepildikterdiń úsh negizgi quramdas bóligi bar ekenin naqtylady: Ýkraına armııasyn qarýlandyrý, odaqtastardyń mindettemeleri jáne eldiń qorǵanys-ónerkásiptik keshenin damytý.
Ýkraına prezıdenti Vladımır Pýtınmen ekijaqty kezdesýge daıyn ekenin jáne bul kezdesýde aýmaqtyq máselelerdi kóterýdi josparlap otyrǵanyn da aıtty.
— Men Pýtınmen ekijaqty kezdesýge daıyn ekenimizdi rastadym jáne barlyq kóshbasshylar meni qoldady, — dedi Zelenskıı Aq úı janyndaǵy brıfıngte. Ol bul kezdesýden keıin Tramptyń qatysýymen úshjaqty kezdesýge úmit artyp otyrǵanyn jetkizdi.
NATO Bas hatshysy Mark Rıýtteniń aıtýynsha, Tramp Ýkraınadaǵy jaǵdaıdy eýropalyq kóshbasshylarmen jáne Vladımır Zelenskıımen vırtýaldy formatta talqylaýdy jalǵastyrady.
— Búgin óte sátti kún boldy. Biz qaýipsizdik kepildikterin talqyladyq. Aldaǵy kúnderi bul baǵytta jumys isteımiz jáne osy top kóshbasshylary men prezıdentpen vırtýaldy taǵy bir kezdesý ótkizemiz, — dedi Soltústik Atlantıkalyq alıans basshysy.
Germanııa kantsleri de pikir bildirip, «Ýkraına úshin sheshýshi kúnder bastalǵandaı áser bar» dedi. Sonymen qatar, ol Vladımır Pýtın men Vladımır Zelenskııdiń kezdesýi eki apta ishinde ótýi kerek ekenin aıtty.
— Búgingi úmitter tek aqtalyp qana qoıǵan joq, tipti asyp tústi, — dedi Germanııa kantsleri.
Buǵan deıin Tramp pen Zelenskıı Aq úıde jabyq kelissózderin aıaqtaǵany habarlanǵan bolatyn.