Aqtóbede kópir ústinde qarsy baǵytqa shyqqan toı kortejiniń júrgizýshisi jazalandy

AQTÓBE. KAZINFORM — Toı kortejine qatysqan 5 kólik ıesine 11 hattama toltyryldy. 

Aqtóbe qalalyq patrýldik polıtsııa qyzmetkerleri áleýmettik jelilerge montorıng jasap, jol erejesin buzǵan toı kortejin anyqtady. Oqıǵa 5 shaǵyn aýdandaǵy kópir ústinde boldy. Vıdeodan toı kortejiniń aldyndaǵy jeńil kóliktiń qarama-qarsy baǵytta qozǵalǵanyn, aldyńǵy terezesinen jigittiń jartylaı shyǵyp turǵanyn kórýge bolady. Sonymen birge kólikterge arnaıy jaryq qurylǵylaryn zańsyz ornatyp alǵan. 

— Patrýldik polıtsııa qyzmetkerleri dereý shara qoldanyp, kólik júrgizýshisine Ákimshilik quqyqbuzýshylyq týraly kodekstiń 603-baby 2-bóligimen ákimshilik hattama toltyryldy. Kólik arnaıy turaqqa qoıyldy. Jol erejesin buzǵan ózge de júrgizýshilerdi ákimshilik jaýapqa tartý hattamasy toltyrylyp, is qujaty sotqa joldandy, — dep habarlady Aqtóbe qalalyq PB patrýldik polıtsııa bóliminiń rota komandıri D. Hasenov.

Toı kortejine qatysqan 5 kólik ıesine 11 hattama toltyrdy.

Eske salsaq, Aqtóbede Toyota Alphard júk kóligimen soqtyǵysyp, tórt adam mert boldy. Oqıǵa Áıteke bı aýdanynyń Belqopa aýyly mańynda tirkeldi.