Tramp zańsyz mıgranttardy «óz erkimen elden shyǵarý» baǵdarlamasyn iske qosty

ASTANA. KAZINFORM —  AQSh prezıdentiniń aıtýynsha, kez kelgen zańsyz mıgrant áýejaıǵa kelip, tegin bılet ala alady, dep habarlaıdy DW. 

— Búgin men zańsyz mıgranttarǵa arnalǵan tarıhtaǵy alǵashqy «óz erkimen elden ketý» baǵdarlamasyn iske qosý týraly jarlyqqa qol qoıdym. Biz zańsyz mıgranttardyń Amerıkadan ketýin barynsha jeńildetip otyrmyz. Kez kelgen zańsyz mıgrant jaı ǵana áýejaıǵa kelip, elimizden shyǵýǵa arnalǵan tegin bılet ala alady, — dep málimdedi AQSh prezıdenti Truth Social áleýmettik jelisinde.

Onyń aıtýynsha, bul úshin arnaıy mobıldi qosymsha iske qosylǵan, onda otanyna bıletke aldyn ala tapsyrys berýge bolady.

Ol mıgranttarǵa «óte mańyzdy shyǵý bonýsyn» da ýáde etti. Donald Tramp onyń naqty mólsherin atamady, biraq zańsyz mıgranttardyń elden ketýi AQSh bıýdjetine «trıllıondaǵan dollar» únemdeıtinin aıtty. Buǵan deıin AQSh-tyń Іshki qaýipsizdik mınıstrligi erikti túrde ketetinderge 1000 dollar tólenetinin habarlaǵan.

Al AQSh-tan óz erkimen shyqpaıtyndarǵa prezıdent «qatań saldar» men «uzaq merzimdi túrme jazasyn» qosa alǵanda, aıyppul, múlik pen tabysty tárkileý sekildi jaza qoldanylatynyn eskertti. Tramp olar kez kelgen elge «bizdiń qalaýymyz boıynsha» májbúrli túrde «kútpegen deportatsııaǵa» ushyraýy múmkin ekenin aıtty.

— Barlyq zańsyz mıgrant: tegin bıletterińizge dál qazir tapsyrys berińizder. Biz sizderdiń Amerıkadan ketkenderińizdi qalaımyz, — dep túıindedi AQSh prezıdenti.

Buǵan deıin Qazaqstan Respýblıkasynyń elshiligi AQSh-ta júrgen otandastarǵa elden erikti túrde shyǵýǵa baılanysty úndeý jasaǵan bolatyn.

AQSh-tan Ózbekstan arqyly deportatsııalanǵan mıgranttar arasynda qazaqstandyqtar bar ekeni týraly jazǵan edik.