Tramp: zańsyz ımmıgranttar úshin baspana bolǵan qalalar qarjylandyrýdan aıyrylady

ASTANA. KAZINFORM – AQSh bıligi qujat ázirlep jatyr, oǵan sáıkes zańsyz mıgranttarǵa pana usynatyn kez kelgen qala nemese shtat federaldyq qarjylandyrýdan aıyrylýy múmkin, dep habarlaıdy TASS.

 Bul týraly AQSh-tyń burynǵy prezıdenti Donald Tramp málimdedi.

— Pana usynatyn qalalarǵa endi jol joq. Olar qurbandardy emes, qylmyskerlerdi qorǵaıdy. Elimizdi masqara etip, búkil álemge kúlkige qaldyrady. Biz osyǵan jol beretin kez kelgen qala nemese shtatty federaldyq qarjylandyrýdan aıyrýǵa múmkindik beretin qujattar daıyndap jatyrmyz, — dep jazdy Tramp óziniń Truth Social áleýmettik jelisindegi paraqshasynda.

Tramp buǵan deıin de AQSh-tyń kóshi-qon saıasatyn qatańdatý qajettigin birneshe ret aıtqan bolatyn.

20 qańtarda prezıdent qyzmetine kiriskennen keıin ol Meksıkamen shekarada tótenshe jaǵdaı rejımin engizý týraly jarlyqqa qol qoıdy.

AQSh Іshki qaýipsizdik mınıstrligi quqyq qorǵaý organdarynyń ókilettigin keńeıtip, zańsyz mıgranttardy elden ımmıgratsııalyq sottyń sheshiminsiz, ıaǵnı jedeldetilgen tártippen deportatsııalaýǵa ruqsat berdi. New York Post gazetiniń Іshki qaýipsizdik mınıstrligindegi derekkózine silteme jasap habarlaýynsha, Tramptyń ınaýgýratsııasynan keıin elden 100 myńnan astam adam shyǵarylǵan.

Aıta ketelik Tramp mıgranttarǵa kúnine 1000 dollarǵa jýyq aıyppul salýdy josparlap otyrǵany týraly jazǵan edik.