Tramp: ıAdrolyq qarýdyń 90% AQSh pen Reseıge tıesili, bul jaqsy emes
ASTANA. QazAqparat - Fınlıandııa astanasy Helsınkı qalasynda sońǵy toǵyz jylda alǵash ret Reseı jáne AQSh basshylary kezdesti. Kezdesý belgilengen ýaqytynan 1 saǵatqa kesh bastaldy, dep habarlaıdy «QazAqparat» HAA buqaralyq aqparat quraldaryna silteme jasap.
Vladımır Pýtın amerıkalyq áriptesi Donald Tramppen kezdesýge qýanyshty ekenin, onymen RF-AQSh qatynastaryn jáne álemdik problemalardy talqylaý nıetin bildirdi.
«Biz turaqty baılanysty jalǵastyryp kelemiz. Telefon arqyly sóılestik jáne túrli halyqaralyq sharalar alańynda birneshe ret kezdestik. Árıne, bizdiń ekijaqty qarym-qatynastarymyz týraly jáne álemdegi kóptegen túıitkildi jaıttar boıynsha egjeı-tegjeıli áńgimelesýdiń ýaqyty jetti», - dedi Reseı prezıdenti.
Ol amerıkalyq áriptesin «qonaqjaı Fınlıandııa jerinde» kórgenine qýanyshty ekenin aıtty. Kezdesýde aldymen Pýtın sóz bastady, biraq jýrnalısterdiń aldynda nebári birer aýyz sózben shekteldi, dep habarlaıdy TASS.
USA TODAY-diń aqparatyna súıensek, AQSh prezıdenti Donald Tramp fototilshiler úshin arnaıy uıymdastyrylatyn dástúrli qol alysý kezinde reseılik áriptesine «saýda, ıadrolyq qarýdan Qytaıǵa deıingi barlyq máselelerdi» talqylaýǵa daıyn ekenin málimdedi.
Prezıdent Tramp «búkil álem Amerıka men Reseıdiń araqatynasy jaqsy bolýyn qalaıtynyn» bildirdi.
Kezdesý Vladımır Pýtınniń Máskeýde kidirip qalýyna baılanysty belgilengen ýaqytynan bir saǵattaı kesh bastaldy.
Fın prezıdenttik saraıyndaǵy kezdesýde Tramp Reseıde ótken fýtboldan Álem chempıonatyn maqtap, onyń «barlyq álem chempıonattarynyń ishindegi úzdigi» bolǵanyn aıtty.
AQSh prezıdenti Reseı basshysyna amerıkan-reseı qarym-qatynastaryn jaqsartýdyń múmkindikterin kórip otyrǵanyn málimdedi, dep habarlaıdy TASS.
«Eki eldiń birlese áreket etýge zor múmkindikteri bar. (...) Barshamyzdy tolǵandyratyn máseleler kóp, men olarǵa jaýap tabamyz dep úmittenemin. Eń mańyzdysy - osy», - dedi Tramp.
«Aqyr aıaǵynda bizdiń qatynastarymyz aıryqsha bolady dep oılaımyn», - dedi AQSh prezıdenti.
Vashıngton ákimshiliginiń basshysy únemi «tatý bolǵan jaqsy» ekenin aıtatynyn taǵy bir ret eske saldy.
Tramp tatýlastyqqa Máskeý men Vashıngton ǵana emes, búkil álem umtylatynyn aıtty.
«Bizdiń tatýlasqanymyzdy búkil álem qalap otyr dep oılaımyn», - dedi ol.
«Bizdiń elder - eki jetekshi ıadrolyq derjava. Olardyń úlesine ıadrolyq qarýdyń 90% tıesili, bul jaqsy emes - jaman», - dedi Tramp.
Reseı jáne AQSh prezıdentteriniń kelissózderi birneshe saǵatqa sozylady, sodan keıin olar baspasóz aldyna shyǵady.
USA TODAY-diń habarlaýynsha, tańerteń Tramp AQSh jáne Reseı qarym-qatynastary eshqashan qazirgideı tómengi deńgeıde bolmaǵanyn aıtqan. AQSh prezıdenti Helsınkıge jeksenbi kúni kelgen.
foto: Mıhaıl Mettsel/TASS
