Tramp Venesýelanyń «zańsyz mıgranttar men qylmystyq top múshelerin» qabyldaýǵa keliskenin málimdedi
ASTANA. KAZINFORM – Amerıka Qurama Shtattarynyń prezıdenti Donald Tramp Venesýelanyń AQSh-tan deportatsııalanatyn venesýelalyq zańsyz mıgranttar men qylmystyq top múshelerin qaıtaryp alýǵa keliskenin málimdedi, dep habarlaıdy reseılik TASS agenttigi.
- Venesýela AQSh-qa qonystanǵan barlyq venesýelalyq zańsyz mıgranttardy, sonyń ishinde Tren de Aragua bandasynyń múshelerin eline qaıtarýǵa kelisti, - dep jazdy Tramp Truth Social áleýmettik jelisinde.
AQSh prezıdenti Venesýelanyń olardy tasymaldaýǵa da kelisim bergenin atap ótti.
Aıta keteıik, buǵan deıin Donald Tramptyń erekshe tapsyrmalar jónindegi ýákili Rıchard Grenell Karakasta bolyp, Venesýela prezıdenti Nıkolas Madýromen kezdesti. Grenell venesýelalyq zańsyz mıgranttardy eline qaıtarý jáne birqatar amerıkalyq azamatty bosatý máselelerin talqylady.
Juma kúni keshke Tramptyń ókili Bolıvar Respýblıkasynan alty AQSh azamatynyń bosatylǵanyn habarlady.
Osyǵan deıin Tramptyń 1 aqpannan bastap úsh elden keletin taýarlarǵa baj salyǵyn engizetini týraly habarladyq.