Tramp Venesýelanyń ýaqytsha prezıdentine eskertý jasady

ASTANA.KAZINFORM — AQSh prezıdenti Donald Tramp The Atlantic basylymyna bergen suhbatynda Venesýelanyń ýaqytsha basshysy Delsı Rodrıgeske «eger durys áreket jasamasa, onyń ótemi Madýronikinen de joǵary bolýy múmkin» degen qatań eskertý jasady, dep habarlaıdy NBC News.

Tramptyń pikiri bir kún burynǵy rıtorıkasynyń ózgergenin ańǵartty. Onda ol Rodrıgestiń Memlekettik hatshy Marko Rýbıomen «sypaıy» sóıleskenin málimdegen.

Alaıda, senbi kúni Rodrıges Nıkolas Madýronyń «Venesýelanyń jalǵyz prezıdenti» ekenin málimdep, ony «dereý bosatýǵa» shaqyrdy.

Jeksenbi kúni keshke Air Force One bortynda tilshilerge sóılegen sózinde Tramp: «Bizge olardyń elindegi munaı men basqa da resýrstarǵa qol jetkizý qajet, bul bizge olardyń elin qalpyna keltirýge múmkindik beredi», — dep málimdedi.

Ispan tilinde jazylǵan sózinde Rodrıges Venesýela AQSh-ty «halyqaralyq quqyq aıasynda» birlesip jumys isteýge shaqyrǵanyn málimdedi.

— Prezıdent Donald Tramp, bizdiń halqymyz ben aımaǵymyz soǵysqa emes, beıbitshilik pen dıalogqa laıyq. Bul árqashan prezıdent Nıkolas Madýronyń ustanymy boldy jáne qazirgi ýaqytta búkil Venesýelanyń ustanymy, — dep jazdy Delsı Rodrıges.

Buǵan deıin Delsı Rodrıges Venesýelanyń ýaqytsha prezıdenti bolǵany týraly habarlanǵan bolatyn.