Tramp Venesýelany AQSh-tyń 51-shtaty etýdi usyndy
ASTANA. KAZINFORM — AQSh prezıdenti Donald Tramp seısenbi kúni Venesýela AQSh-tyń 51-shtatyna aınalýy múmkin ekenin aıtty. Ol buǵan eki eldiń munaı salasyndaǵy yntymaqtastyǵynyń artýyn negiz etti, dep habarlaıdy Kazinform agenttiginiń menshikti tilshisi Anadolu Ajansı agenttigine silteme jasap.
— Venesýelamen aramyzda óte jaqsy, tamasha qarym-qatynas ornady. Osy úshin Venesýelaǵa alǵys aıtqym keledi, — dedi Donald Tramp Tehas shtatynyń Korpýs-Krıstı qalasynda ótken saılaýaldy mıtıngide jaqtastaryna.
Tramp eki el arasyndaǵy kelisimge sáıkes Venesýeladan alǵashqy 1 mıllıon barrel munaı tegin jetkizilgenin habarlady.
— Bul tarıhı jeńis álemdik munaı qorynyń edáýir bóligine baqylaý ornatýǵa múmkindik beredi. Munaı AQSh-ta, sonyń ishinde dál osy Korpýs-Krıstı qalasynda óńdeledi, — dedi AQSh prezıdenti.
Tramp Venesýelaǵa salynǵan ınvestıtsııanyń arqasynda elde bir jyl buryn elestetý múmkin bolmaǵan kólemde jumys oryndary ashylyp jatqanyn málimdedi.
— Biz óz qajetimizge mol kólemde munaı óndiremiz. Venesýela da órkendegen elge aınalady. Al kim bilsin, bálkim, bir kúni AQSh-tyń gúldengen 51-shtaty bolar. Bulaı bolýy da múmkin, — dedi Donald Tramp.
Budan keıin AQSh prezıdenti Venesýelada prezıdenttiń ornyna gýbernator bolýy múmkin ekenin aıtyp, óz usynysyn taǵy da qaıtalady.
— Venesýelany AQSh-tyń 51-shtatyna aınaldyraıyq. Sonda prezıdenttiń ornyna gýbernator saılaımyz. Bul ıdeıa sizderge qalaı? Venesýelada munaı qory mol ekenin bilesizder, — dedi Donald Tramp.
Buǵan deıin AQSh prezıdenti Donald Tramp Kanadany AQSh-tyń 51-shtaty etý týraly usynysyn taǵy da aıtqanyn habarlaǵan edik.
