Tramp Venesýelada qurlyqtaǵy áskerı operatsııanyń júrgizilý múmkindigin joqqa shyǵarmady
ASTANA. KAZINFORM – Donald Tramp Venesýelaǵa qatysty áreket etýdiń esh nusqasyn, sonyń ishinde qurlyqtaǵy áskerı operatsııanyń júrgizilýin joqqa shyǵarmaıtynyn málimdedi. Ol bul málimdemeni Aq úıde tilshilerdiń suraqtaryna jaýap berý kezinde jasady, dep habarlaıdy TASS aqparat agenttigi.
Tilshiniń «qazirgi ýaqytta osyǵan qatysty qandaı da bir máseleni, sonyń ishinde qurlyq áskerlerin paıdalanýdy joqqa shyǵarýǵa daıynsyz ba» degen suraǵyna Tramp: «Men eshteńeni joqqa shyǵarmaımyn, bizge tek Venesýela máselesin sheshý kerek», - dep jaýap berdi.
Buǵan deıin Tramp ákimshiligi Bolıvarıan Respýblıkasynyń kóshbasshysy Nıkolas Madýrony bılikten taıdyrý úshin Venesýelada áskerı operatsııa júrgizýdiń úsh múmkin nusqasyn qarastyryp otyrǵanyn habarlaǵan bolatynbyz.
Sondaı-aq AQSh Venesýela mańyndaǵy áskerı-teńiz bazasyn jańǵyrtyp jatqanyn jazdyq.
Suhbat kezinde Madýronyń qazirgi qyzmetinen jaqyn arada kete me degen suraqqa Tramp: «Men ıá dep aıtar edim. Men solaı dep oılaımyn, ıá», - dep jaýap berdi.
AQSh Qorǵanys mınıstrligi qazan aıynyń sońynda «Djerald R.Ford» eń iri ushaq tasymaldaǵysh kemesi Karıb teńizine bet alǵanyn jarııalady.
AQSh qorǵanys vedomstvosynyń málimdemesinde ushaq tasymaldaýshy «transulttyq qylmystyq uıymdardy joıý jáne esirtki terrorızmine qarsy turý jónindegi prezıdenttiń bastamasyn qoldaý úshin» jiberilip jatqanyn málimdedi.
Qarasha aıynda AQSh-tyń ushaq tasymaldaýshy kemeleri Karıb teńizine endi.
Jeksenbi kúni keshke Tramp Venesýela prezıdentimen kelissóz júrgizýi múmkin ekenin málimdedi.
Sondaı-aq AQSh Tramp ákimshiligi Venesýela prezıdenti basqarady dep málimdegen «Kartel de los Solesti» sheteldik lańkestik uıym dep tanýdy kózdep otyrǵany habarlandy.
