Tramp Venesýela ústinen áýe keńistigin jabatynyn jarııalady

ASTANA. KAZINFORM – AQSh prezıdenti Donald Tramp Venesýela ústin jáne oǵan jaqyn aımaqtaǵy áýe keńistigin tolyq jabý týraly sheshim qabyldady. Bul týraly BBC habarlaıdy.

Bul qadam resmı túrde «esirtki trafıgimen kúres» uranymen túsindirilgenimen, sarapshylardyń pikirinshe, Vashıngtonnyń shynaıy maqsaty – prezıdent Nıkolas Madýrony bılikten ketirý.

Tramp óz málimdemesin Truth Social áleýmettik jelisinde jarııalady.

«Barlyq avıakompanııalar, pılottar, esirtki tasymaldaýshylar jáne adam saýdasymen aınalysatyndar nazar aýdarsyn: Venesýela ústindegi jáne onyń aınalasyndaǵy áýe keńistigi tolyǵymen jabylady. Nazar salǵandaryńyzǵa raqmet!» - delingen jazbada.

Ótken aptada AQSh Venesýela jaǵalaýyna álemdegi eń qýatty ári zamanaýı áskerı kemelerdiń biri — «Djerald Ford» avıanosetsin jibergen. Buǵan deıin Pýerto-Rıkoda AQSh armııasynyń oqý-jattyǵýlary ótip, onda desant túsirý jáne strategııalyq bombalaýshy shabýyldarynyń ımıtatsııasy júrgizilgen.

Sonymen qatar Tramp Venesýeladaǵy esirtki kartelderine qarsy jerústi áskerı operatsııasyn da jarııa etti.

Óz kezeginde Venesýela prezıdenti Nıkolas Madýro qarasha aıynyń basynda qurlyq, teńiz, áýe jáne zymyran kúshterin jappaı jumyldyrýdy bastaǵanyn málimdegen.