Tramp: Venesýela AQSh-qa 30-dan 50 mln barrelge deıin munaı jetkizedi
ASTANA. KAZINFORM – Venesýela AQSh-qa 30-dan 50 mln barrelge deıin joǵary sapaly munaı jetkizedi. Bul týraly AQSh prezıdenti Donald Tramp málimdedi.
- Venesýelanyń ýaqytsha bıligi Amerıka Qurama Shtattaryna 30-dan 50 mln barrelge deıin joǵary sapaly, paıdalanýǵa ruqsat etilgen munaı beretinin habarlaýǵa qýanyshtymyn. Bul munaı naryqtyq baǵamen satylady, al men Amerıka Qurama Shtattarynyń prezıdenti retinde bul qarajattyń Venesýela men Qurama Shtattar halqynyń ıgiligi úshin paıdalanylýyn qamtamasyz etý úshin olardy qadaǵalaımyn! Men energetıka mınıstri Krıs Raıtqa bul jospardy dereý júzege asyrýǵa kirisýin tapsyrdym. Munaı saqtaý kemelerimen tikeleı Qurama Shtattaryndaǵy túsirý aılaqtaryna jetkiziledi, - dep jazdy AQSh prezıdenti Donald Tramp 7 qańtarda óziniń TruthSocial áleýmettik jelisindegi akkaýntynda.
Eske sala ketsek, 3 qańtarda AQSh Venesýelaǵa qarsy operatsııa bastap, prezıdent Nıkolas Madýro men onyń áıelin tutqyndady. Keıinirek AQSh prezıdenti Donald Tramp Madýro men onyń áıeli Nıý-Iorkke kememen jetkiziletinin jarııalady.
Nıkolas Madýro men onyń áıeli Sılııa Floreske esirtki terrorızmin uıymdastyrdy, kokaın ımporttaýǵa jáne AQSh-qa qarsy pýlemetter men jarylǵysh qurylǵylar saqtaý isine qatysty degen aıyp taǵyldy.
Sol kúni Venesýelanyń Joǵarǵy Soty vıtse-prezıdent Delsı Rodrıgeske tolyq prezıdenttik ókilettik berdi.
Delsı Rodrıges Venesýelanyń ýaqytsha prezıdenti retinde ant berdi.
6 qańtarda Madýro men onyń áıeli Brýklındegi Metropolıten ustaý ortalyǵynan tikushaqpen Manhettendegi tikushaq alańyna kúsheıtilgen kúzetpen jetkizildi. Sodan keıin tyńdaýdan birneshe saǵat buryn kortejben sot ǵımaratyna jetkizildi. Bılikten qýylǵan Venesýela kóshbasshysy men onyń áıeli kinásin moıyndamady. Kelesi sot tyńdaýy 17 naýryzda ótedi.
Buǵan deıin BUU Bas hatshysy jáne birneshe eldiń bıligi AQSh bastaǵan Latyn Amerıkasy eline jasalǵan iri áýe shabýylynan keıin Venesýeladaǵy jaǵdaıǵa alańdaýshylyq bildirgen bolatyn.