Tramp usynǵan trıýmfaldy arka jobasy aldyn ala maquldandy
ASTANA. KAZINFORM – AQSh prezıdenti Donald Tramp usynǵan Vashıngtonda trıýmfaldy arka salý jobasy AQSh-tyń beıneleý óneri jónindegi komıssııasy tarapynan aldyn ala maquldandy, dep habarlaıdy Kazinform tilshisi.
Joba AQSh táýelsizdiginiń 150 jyldyǵyna oraı usynylǵan. Tramp Parıjdegi Trıýmfaldy arka úlgisinde bıiktigi 76 metr bolatyn alyp nysan salýdy josparlap otyr. Bul kórsetkish Parıjdegi arkadan (49 metr) edáýir joǵary. Josparǵa sáıkes, jańa nysan álemdegi eń bıik trıýmfaldy arkaǵa aınalmaq. Ol Lınkoln memorıalynan eki ese bıik bolyp, shamamen AQSh Kapıtolııi deńgeıine jaqyndaıdy.
Jobanyń aýqymy onyń Ronald Reıgan atyndaǵy ulttyq áýejaı mańynda ornalasýyna baılanysty birqatar suraq týyndatqan. Bul týraly NBC News jazdy.
Jospar boıynsha arkada qyran qustardyń beınesi, Bostandyq músini sımvoly jáne AQSh týyna adaldyq antynyń úzindisi beınelenedi.
Komıssııa músheleri joba avtory, frantsýz sáýletshisi Nıkolıa Sharbonnoǵa birqatar arhıtektýralyq ózgerister engizip, jobanyń ekinshi nusqasyn ázirleýdi usyndy.
Sonymen qatar Donald Tramp ákimshilik ǵımarattardyń birin – Eızenhaýer atyndaǵy ǵımaratty aq túske boıaýdy jáne Potomak ózeni jaǵasynda «Amerıkanyń ulttyq batyrlar baǵy» atty jańa keshen salýdy usynǵan.
– Bul joba AQSh tarıhyndaǵy mańyzdy kezeńdi aıshyqtaıtyn iri arhıtektýralyq nysan bolýǵa tıis. Biz usynylǵan sheshimderdi jetildirý úshin qosymsha ózgerister engizýdi suradyq, – delingen komıssııa ókilderiniń pikirinde.
Aıta keteıik, Tramp Isa paıǵambarǵa uqsas keıpindegi sýretiniń jarııalanýyn túsindirdi.
