Tramp ýkraındyq bosqyndy óltirgen adamdy ólim jazasyna kesýge shaqyrdy

ASTANA. KAZINFORM — AQSh prezıdenti Soltústik Karolına shtatynyń Sharlotta qalasynda ýkraınalyq bosqyn Irına Zarýtskaıany poıyzda aıýandyqpen óltirgeni úshin kishi Dekarlos Braýndy ólim jazasyna kesýge shaqyrdy, dep habarlaıdy New York Post. 

— Beıbitshilik pen qaýipsizdik izdep Amerıkaǵa kelgen ýkraınalyq boıjetkendi sonshalyqty aıýandyqpen óltirgen ań «jyldam» (buǵan esh kúmán joq!) sot aldynda jaýap berip, tek ólim jazasyna kesilýi kerek, — dep málimdedi Donald Tramp Truth Social-da.

Bas prokýror Pem Bondı «bul keshirilmeıtin qylmys úshin eń joǵary jazaǵa qol jetkizýge» ýáde berdi jáne kúdikti «endi erkin adam retinde eshqashan kún kórmeıtinin» málimdedi.

Braýnnyń Soltústik Karolınada 2007 jyldan beri shabýyldan bastap tonaý men atys qarýyn zańsyz ustaýǵa deıingi qylmystary úshin kem degende 14 ret qamaýǵa alynǵany belgili bolǵannan keıin onyń kisini aıaýsyz óltirýi búkil elde narazylyq týdyrdy.

Beınejazbada 22 tamyzda poıyzda kele jatqan 23 jastaǵy Zarýtskaıany er adam qalta pyshaǵyna uqsaıtyn zatpen birneshe ret pyshaqtaǵany kórinedi.

Zarýtskaıa 2022 jyly Reseı Ýkraınaǵa basyp kirgennen keıin AQSh-qa qashyp ketken. Ákesi Ýkraınada soǵys júrip jatqandyqtan qyzynyń jerleý rásimine qatysa almady.

34 jastaǵy Braýnǵa seısenbide federaldyq is boıynsha qoǵamdyq kólikte adam ólimine sebepker boldy degen aıyp taǵyldy. Ol sondaı-aq shtat zańy boıynsha birinshi dárejeli kisi óltirdi degen aıyppen jaýap beredi.

Braýnnyń anasy BAQ-qa ulynyń shızofrenııamen aýyratynyn jáne kóshede júrýge ruqsat bermeý kerektigin baıandady.

Soltústik Karolına — áli kúnge deıin ólim jazasyn qoldanatyn 27 shtattyń biri.

Buǵan deıin Boston men Chıkagoda zańsyz mıgranttarǵa qarsy operatsııalar ótip jatqanyn habarlaǵan bolatynbyz.