Tramp: Ýkraınamen sırek kezdesetin mıneraldar jónindegi kelisimge kelesi aptada qol qoıylady

ASTANA. KAZINFORM –  AQSh prezıdenti soǵystyń bastalýyna jaýapkershilikti burynǵy prezıdent Baıdenge júktedi. Bul týraly Anadoly habarlady. 

Tramp Aq úıde Italııanyń premer-mınıstri Djordjııa Melonıdi qabyldap, Reseı men Ýkraına arasyndaǵy soǵysqa qatysty sońǵy jaǵdaı týraly aıtty.

Tramp Kıevpen sırek kezdesetin mıneraldar boıynsha kelisim aıaqtalǵanyn málimdedi. 

— Bizde paıdaly qazbalar jóninde kelisim bar, oǵan kelesi beısenbide qol qoıylady dep oılaımyn. Ýkraına bul kelisimdi oryndaıdy dep úmittenemiz, kóre jatarmyz. Biraq bul másele boıynsha ýaǵdalastyq bar, — dedi ol.

Máskeýdegi reseılik tarappen júrgizilip jatqan kelissózder týraly aıta kele, Tramp osy aptada Máskeýden habar kútip otyrǵanyn jetkizdi.

Ýkraına prezıdenti Vladımır Zelenskıı soǵys úshin jaýapty ma degen suraqqa AQSh prezıdenti bylaı jaýap qatty.

— Zelenskııdiń jaýapty ekenin bilmeımin, biraq bul soǵys múlde bastalmaýy kerek edi. Men Zelenskııdi aıyptamaımyn, biraq onyń óte jaqsy jumys istep jatqanyn da aıta almaımyn. Men onyń jankúıeri emespin, — dep jaýap berdi ol.

Soǵystyń bastalýyna jaýapkershilikti AQSh-tyń burynǵy prezıdenti Djo Baıdenge júktegen Tramp endi bul soǵysty toqtatý qajet ekenin jáne ózi osy baǵytta jumys istep jatqanyn atap ótti.

— Reseı — áldeqaıda úlken el, áskerı jaǵynan qýatty derjava. Eger siz aqyldy bolsańyz, Baıdendi bul kresloda otyrǵany úshin aıyptaýǵa bolatyn soǵysqa kirispes edińiz, — dedi ol.

Tramp sondaı-aq Italııanyń Ýkraınadaǵy bitimgerlik mıssııasyna qatysýy jónindegi suraqqa da jaýap berip ketti. 

— Bul — Italııanyń sheshimi. Men bitimgerlik mıssııaǵa kózqarasym durys, — dep jaýap berdi. 

Aıta ketelik Italııa premer-mınıstri Djordjııa Melonı Eýropa úshin tarıfterdi tómendetýge qol jetkizý maqsatynda Aq úıge barǵan edi.