Tramp: Ýkraınaǵa usynylǵan beıbitshilik jospary sońǵy nusqa emes
ASTANA. KAZINFORM — Donald Tramp Ýkraınaǵa usynylǵan soǵysty beıbit jolmen retteý jospary sońǵy nusqa bolyp tabyla ma degen suraqqa teris jaýap berdi, dep habarlaıdy DW.
Buǵan deıin, bir kún buryn, amerıkalyq prezıdent Donald Tramp 27 qarasha kúnin Ýkraına úshin AQSh usynǵan kelisimdi qabyldaýdyń qolaıly kúni dep ataǵan edi.
Amerıkalyq beıbitshilik jospary 28 tarmaqtan turady, onyń ishinde Ýkraına keıbir aýmaqtyq máselelerde kelisim jasaýǵa, qarýly kúshterin qysqartýǵa jáne keıbir qarý túrlerinen bas tartýǵa tıis.
Reseı men Ýkraına basshylary Donald Tramptyń beıbitshilik josparyna qatysýy múmkin ekenin aıtty, biraq onyń sátti aıaqtalýyna kúmán keltirdi.
Ýkraına prezıdenti Vladımır Zelenskıı óz eli qıyn tańdaý aldynda qalýy múmkin ekenin eskertti: «qadir-qasıetin» joǵaltý nemese eń mańyzdy odaqtasynyń qoldaýynan aıyrylý — bul rette ol eldiń atyn atamady. Zelenskıı kelesi apta «óte kúrdeli» bolatynyn aıtty.
Vladımır Pýtın Ulttyq qaýipsizdik keńesi múshelerimen kezdesý kezinde Máskeý «túbegeıli beıbit retteý» úshin ázirlengen 28 tarmaqtan turatyn jospardy negizge alýǵa daıyn ekenin, biraq ony áli egjeı-tegjeıli qarastyrmaǵanyn jetkizdi.
Pýtın Reseı bul jospardyń nusqasyn bıyl jazda Alıaskadaǵy sammıt kezinde Tramp ákimshiligimen talqylaǵanyn jáne 28 tarmaqtan turatyn jobany «negizinen jańartylǵan» nusqa dep atady.
Resmı túrde 28 tarmaqtan turatyn beıbitshilik josparynda «Ýkraına senimdi qaýipsizdik kepildikterine ıe bolady» dep kórsetilgen, oǵan NATO tarapynan beriletin qaýipsizdik kepildikteri de kiredi.
DW agenttigi sonymen qatar, AQSh, Ýkraına, Germanııa, Frantsııa jáne Ulybrıtanııanyń joǵary laýazymdy ókilderi beıbitshilik josparyn talqylaý úshin jeksenbide Jenevada kelissózder bastaıtynyn jazdy.
Agenttik málimetinshe, Shveıtsarııaǵa AQSh memlekettik hatshysy Marko Rýbıo jáne Tramptyń arnaıy ókili Stıv Ýıtkoff barýy tıis.
— Biz sońǵy máselelerdi kelistirýdi jáne Ýkraına múddesine saı keletin kelisimge qol jetkizýdi úmit etemiz, — dedi amerıkalyq bıliktiń ókili Reuters agenttigine.
Onyń aıtýynsha, sońǵy kelisim Donald Tramp pen Vladımır Zelenskııdiń jeke kezdesýi kezinde ǵana qabyldanýy múmkin.
Budan buryn EO, Ýkraına AQSh-tyń beıbitshilik josparyn 23 qarashada talqylaıtyny belgili boldy.