Tramp Ýkraınaǵa kelýi múmkin: prezıdentter kezdesýiniń qorytyndylary aıtyldy

ASTANA. KAZINFORM — Donald Tramp Vladımır Zelenskıımen kelissózderdiń qorytyndysy boıynsha ótken baspasóz konferentsııasyn asha otyryp, olardyń «óte jaqsy kezdesý ótkizgenin» jáne «ájeptáýir progreske qol jetkizgenin» málimdedi, dep habarlady DW basylymy.

«Biz Reseı men Ýkraına arasyndaǵy kelisimge qol jetkizýge barǵan saıyn jaqyndap kelemiz», dedi Tramp.

Vladımır Zelenskııdiń aıtýynsha, AQSh pen Ýkraına arasyndaǵy qaýipsizdik kepildikteri 100 paıyzǵa kelisilgen, al AQSh, Ýkraına jáne Eýropa arasyndaǵy qaýipsizdik kepildikteri de derlik tolyq kelisilgen.

Tramp Ýkraına men Reseı Donbass mártebesin retteý máselesine «jaqyndap qalǵanyn» málimdedi, alaıda bul másele áli de kúrdeli kúıinde qalyp otyr.

«Bul másele tolyq sheshilgen joq, biraq biz ony sheshýge barynsha jaqyndadyq», dep jaýap berdi ol jýrnalıstiń suraǵyna.

Zaporoje atom elektr stantsııasyna (ZAES) qatysty AQSh prezıdenti bul máseleni Vladımır Pýtınmen telefon arqyly sóılesý barysynda talqylaǵanyn jáne onyń «Ýkraınamen birge stantsııany ashý baǵytynda jumys istep jatqanyn» aıtty.

Tramptyń sózinshe, Reseı Ýkraınany qalpyna keltirýge kómektesýge nıetti.

«Reseı Ýkraınanyń tabysty bolǵanyn qalaıdy», dedi AQSh prezıdenti, sondaı-aq Pýtınniń «elektr energııasyn óte tómen baǵamen jetkizýge daıyn ekenin» atap ótti.

Al VVS-diń jazýynsha, Tramp Pýtınniń «AES-ke zymyrandarmen soqqy jasamaǵanyn» atap ótken. Onyń sózderinen Reseı prezıdentiniń mundaı ustamdylyǵyn joǵary baǵalaıtyny ańǵaryldy.

Degenmen Vladımır Zelenskıı bul taqyrypqa qatysty eshqandaı pikir bildirgen joq.

Soǵystyń qashan aıaqtalýy múmkin ekeni týraly suraqqa jaýap bergen Tramp onyń «birneshe apta ishinde aıaqtalýy múmkin» ekenin, alaıda «múlde aıaqtalmaýy da yqtımal» ekenin aıtty.

Dese de «eń kúrdeli» dep sanalatyn qandaı másele áli sheshilmeı turǵany týraly suraqqa jaýap bergen Donald Tramp bul másele aýmaqtarǵa qatysty ekenin aıtty.

Onyń aıtýynsha, Ýkraınaǵa kelisimdi dál qazir jasaǵany tıimdi, áıtpese ol el «taǵy da jerinen jáne adamynan aıyrylýy múmkin». Tramp Ýkraına erlikpen shaıqasqanyn atap ótip, alaıda «qaqtyǵysty toqtatatyn ýaqyt keldi» dep málimdedi.

Sondaı-aq Tramp Ýkraınaǵa kelýge daıyn ekenin, biraq aldymen kelisim jasasýdy jón kóretinin aıtty.

AQSh prezıdenti budan bólek, eger Vladımır Zelenskıı munyń paıdasy tıedi dep eseptese, Ýkraına parlamentinde sóz sóıleýge de daıyn ekenin málimdedi.

Aıta keteıik, buǵan deıin Florıdada Tramp pen Zelenskııdiń kezdeskenin jazdyq.